Guðni Th Jóhannesson, forseti Íslands.

Orðið á götunni er að Benedikt Jóhannesson nýr fjármálaráðherra hafi ekki gert forseta Íslands neinn greiða með því að skýra frá einkafundi þeirra fyrir átta mánuðum á vefsíðu sinni.

Eins og Eyjan segir frá í frétt í dag, fjallar Benedikt um fyrsta ríkisráðsfund sinn á vefsvæði sínu og segir meðal annars:

„Mér varð hugsað til þess hvort maður væri ekki lentur í vitlausu leikriti. Nú sátum við þarna við endann, Guðni Th. og ég, rúmlega átta mánuðum eftir að ég spjallaði við hann og hvatti til forsetaframboðs með tilheyrandi plotti. Þá hafði hvorugur okkar nokkru sinni boðið sig fram til opinbers embættis. Svona er þetta líf skrítið.“

Guðni Th. Jóhannesson vann hug og hjörtu þjóðarinnar í kosningabaráttunni og enn frekar með framgöngu sinni fyrstu vikur og mánuðina í embætti.

Hann er hreinn og beinn, einlægur í tilsvörum og leysti ágætlega úr flókinni stöðu sem kom upp í stjórnarkreppunni að afloknum kosningum.

Þess vegna kemur mjög á óvart að hann hafi setið fyrir einhverjum mánuðum og plottað með formanni Viðreisnar um framboð sitt.

Því að Guðni hefur alls ekki ímynd plottarans í huga þjóðar sinnar.

Vigdís Hauksdóttir, fv. þingmaður og formaður fjárlaganefndar, deilir Eyjufréttinni á fésbók og segir:

– nú nú – Viðreisn á forsetann með húð og hári
Gott að formaðurinn kjaftaði af sér – þá getum við fylgst með lagasetningunni með gagnrýnum augum
Ég tel þessar fréttir rosalegt áfall fyrir lýðræðið í landinu – þið verðið að fyrirgefa: „með tilheyrandi plotti“

Orðið á götunni er að best væri fyrir fjármálaráðherrann og forsetann að leggja spilin sem fyrst á borðið og útskýra í hverju þetta plott fólst.