Samkvæmt könnunum Maskínu á fylgi flokkanna hefur fylgi Miðflokksins dalað lítillega undanfarna mánuði. Einkum hefur flokkurinn tapað vinsældum hjá yngstu kjósendum á aldrinum 18-29 ára. Hjá þeim aldurshóp mælist fylgið í dag 14,9 prósent en í janúar náði það hæstu hæðum í 24,4 prósentum. Heildarfylgi flokksins mælist nú 18,4 prósent, en flokkurinn virðist marktækt höfða meira til karla en kvenna, en 24,9 prósent karla sögðust ætla að kjósa flokkinn en aðeins 11,4 prósent kvenna. Eins er flokkurinn töluvert vinsælli á landsbyggðinni en á höfuðborgarsvæðinu og vinsælli meðal fólks sem er með yfir milljón á mánuði í tekjur heldur en hjá þeim sem eru tekjulægri.

Samfylkingin mælist áfram með mest fylgi allra flokka en dregið hefur þó úr fylginu sem mældist 27 prósent hjá Maskínu í janúar en mælist nú 25,5 prósent. Þegar tölurnar eru rýndar er Samfylkingin að tapa fylgi í borginni, en þar mældist flokkurinn með 35,7 prósent í janúar en mælist nú með 28,7 prósent. Á sama tíma er flokkurinn að bæta við sig fylgi hjá nágrannasveitarfélögum borgarinnar en þar hefur það farið úr 21,8 prósentum í janúar upp í 26,7 prósent nú í mars. Fylgi Samfylkingarinnar á Austurlandi hefur svo hrapað úr 34,9 prósentum í janúar niður í 15,1 prósent í mars, en íbúar í þeim landshluta hafa greinilega snúið sér til Sjálfstæðisflokksins þar sem fylgið mælist nú 27 prósent en mældist aðeins 8,3 prósent í janúar.

Þegar rýnt er í tölurnar má sjá fleiri breytingar, eins og hvernig Sjálfstæðisflokkurinn er á miklu flugi á Suðurlandi og Reykjanesi, Viðreisn er á miklu flugi hjá yngstu kjósendunum, Framsókn tekur dýfu á Austurlandi og bætir við sig fylgi hjá tekjuhærri hópum en tapar á sama tíma fylgi hjá tekjulægri .

Á myndinni fyrir neðan má sjá mælingar Maskínu fyrir janúar annars vegar og svo nýjustu mælinguna fyrir mars. Rétt er að gera þann fyrirvara að úrtakið í janúar var töluvert minna en úrtakið í mars.