Jón Pétur Zimsen, nýr þingmaður Sjálfstæðisflokksins sem hefur vakið athygli fyrir framgöngu sína í tildæmis plasttappa-málinu alræmda, birti í gær færslu á Facebook sem hefur vakið töluverða furðu og eins vakti það athygli þegar hann í framhaldinu fór að munnhöggvast við fólk í athugasemdum.
Færslan er eftirfarandi:
„Hver ertu?
Finnst þér erfitt þegar öðrum gengur vel, hvers vegna ekki ég?
Borgar þú minna til samfélagsins en þú þiggur?
Þeir sem eru vel stæðir hafa skarað eld að eigin köku með óeðlilegum hætti.
Þeir sem þurfa tímabundna hjálp til sjálfshjálpar eiga að fá að rotna í helvíti enda aumingjar.
Ertu stjórnlyndur?
Ertu til í að tala meira um óréttlæti en að gera raunverulega eitthvað í því.
Skiptir þig meira máli að fólk haldi að þú sért góður og fáir mörg ,,like” á það en að þú gerir raunverulega eitthvað í því.
Ertu til í stundarvinsældir þó að það kosti almannahag á endanum?
Þeir sem standa sig vel eiga að vinna töluverða nauðungarvinnu fyrir þà sem leggja sig minna fram.
Langar þig að sýnast vera góð manneskja á netinu og eltir því það sem er vinsælt hverju sinni því það er auðvelt að hneykslast á hinu.
Ertu yfirborðskenndur og frasatamur? Finnst gott að elta það sem hljómar vel en nennir ekki alveg að kynna þér það? En myndir ALDREI viðurkenna það?
Ertu x( S,C,F) maður?
Þeir sem svara nei eru líklegir til að sökkva sér í málin, taka afstöðu út frá staðreyndum en ekki tilfinningum.
Vilja ÖLLUM gott og lyfta öllum.
Þeir sem svara Já eru líklega bitrir. Einhver hefur komið illa fram við þà og þeir eru í vandræðum með sjálfsmynd sína.
Þeim finnst þeir ekki metnir að verðleikum og að heimurinn sé ÓSANNGJARN.
Að allt sé einhverjum ÖÐRUM að kenna og því nærtækt að kenna þeim um sem hafa það betur.“
Þarna er þingmaðurinn að halda því fram að þeir sem svara spurningum hans játandi séu stuðningsmenn ríkisstjórnarflokkanna, klárlega bitrir og í vandræðum með sjálfsmynd sína.
Þegar einn netverji spyrði þingmanninn hvað hann eiginlega meinti með því að skrifa hreinlega: Ha? í athugasemd bað Jón Pétur vinsamlegast um efnislega gagnrýni. Því svaraði netverjinn: Efnislega gagnrýni á að kjósendur annarra flokka séu bitrir?
Annar sagði þetta eina þá „klikkuðustu“ færslu sem hann hafi séð frá sitjandi þingmanni. Færslan sé skrifuð eins og höfundur sé pirraður nemandi úr grunn- eða framhaldsskóla. „Ég mæli með að Sjálfstæðisflokkurinn ráði nokkra PR-fulltrúa og þingmenn þurfi samþykki áður en hlutir eru settir á netið. Litla þvælan sem ég var að lesa. Sjálfstæðisflokknum til skammar.“
Jón Pétur svarar því að færsla hans hafi greinilega staðfest „þá taug sem ég hef snert“ og að halda því fram að almannatengsl (PR) hjálpi eitthvað í raunveruleikanum sé nákvæmlega það sem valkyrjurnar séu að treysta á. „Að þú sért meira fyrir umbúðir en innihald er eitthvað sem þú þarft að eiga við þig og ÞÍNA“.
Þingmaðurinn krefur þá sem svara færslunni með neikvæðum hætti að komi með efnislega gagnrýni en það sé svo að gagnrýnendur fari alltaf í manninn frekar. „Fólk sem getur ekki unnt öðrum sem gengur vel og fær orðræðu sem styður það er fljótt að stökkva. Síðan þegar því er bent á rangindin þarf verulega mikil sjálfstraust til að viðurkenna rangindin, þetta sjálfstraust hafa fæstir. Veit að þetta er ekki réttur PR texti en það skiptir mig engu. Er engum háður nema ykkur. Dæmið mig í næstu kosningum.“
Af fleiri athugasemdum Jóns Péturs má ráða að færslan sé skrifuð í tilefni af veiðigjaldafrumvarpinu. Þar sé verið að tvöfalda skatta á undirstöðuatvinnugrein og taka peninga frá vel reknum fyrirtækjum.
Ein spyr þingmanninn: „Hver ertu? Ertu auðmannasleikja sem lítur niður á fólk sem ekki á peninga?“ og Jón Pétur spyr jafnharðan til baka: „Hvers vegna hatar þú fólk sem hefur náð árangri í lífinu?“
Annar ráðleggur þingmanninum að eyða færslunni enda sé hann ekki að gera sér mikinn greiða með henni.
