Guðrún Hafsteinsdóttir, þingmaður Sjálfstæðisflokksins, segir að tölur um fjölgun opinberra starfsmanna á Íslandi séu sláandi og það sé staðreynd sem verði að ræða án þess að fara í skotgrafir. Hún bendir á að eðli málsins samkvæmt standi einkageirinn undir verðmætasköpun í landinu. Þetta kemur fram í aðsendri grein í Morgunblaðinu í dag.

„Op­in­ber­um starfs­mönn­um fjölgaði um 11.400 á ár­un­um 2015-2021 eða um 21,4%. Á sama tíma fjölgaði starfs­fólki á al­menn­um vinnu­markaði um 4.200 eða um 3%,“ segir Guðrún og vísar í nýútkomna skýrslu frá Félagi atvinnurekenda. Hún bendir jafnframt á að laun fari hækkandi hjá hinu opinbera og dregur fram eftirfarandi samanburðarpunkta:

• Laun eru orðin hærri víða í op­in­bera kerf­inu en á einka­markaði.

• Líf­eyr­is­rétt­indi eru orðin jöfn í op­in­bera geir­an­um og á einka­markaði.

• Vinnu­tím­inn er styttri hjá hinu op­in­bera.

• Starfs­ör­yggið er meira með ráðning­ar­vernd hins op­in­bera.

• Verðmæt­in verða til í einka­geir­an­um til að standa und­ir stjórn­sýslu og op­in­berri starf­semi að stór­um hluta.

Ríkisútgjöld eiga eftir að hækka

Guðrún segir það vera skrifað í skýin að ríkisútgjöld eigi eftir að hækka vegna öldrunar þjóðarinnar. Því verði að auka verðmætasköpun, stækka kökuna sem verður til skiptanna. „Fyr­ir ligg­ur að við þurf­um að auka út­flutn­ing um þúsund millj­arða króna á næstu tveim­ur ára­tug­um til að halda hér uppi þeim lífs­gæðum sem við þekkj­um í dag. Það ger­ir um millj­arð króna á viku!“

Guðrún segir að eina leiðin til að auka verðmætasköpun í landinu sé að örva einkaframtakið enda verði nánast allar útflutningstekjur þjóðarinnar til í einkageiranum. En á sama tíma og störfum fjölgar takmarkað í einkageiranum hafi orðið stórfjölgun starfa hjá ríki og sveitarfélögum. Guðrún skrifar:

„Hvað sem hver seg­ir þá ber brýna nauðsyn til þess að stíga á brems­ur, stöðva þenslu op­in­bera kerf­is­ins, koma á það bönd­um og draga úr um­svif­um þess með því að flytja þaðan verk­efni og störf til einka­geir­ans í mun meira mæli en gert hef­ur verið. Í þeim efn­um höf­um við ekki val.“

Segir hún að margir stjórnmálamenn og embættismenn telji að verðmætin skapist innan skrifstofuveggja hins opinbera.