Hrafnhildur Helga Össurardóttir hefur verið ráðin upplýsingafulltrúi háskóla-, iðnaðar- og nýsköpunarráðuneytisins. Hún hefur störf í apríl samkvæmt tilkynningu á vef Stjórnarráðsins.
Hrafnhildur lauk B.A. námi í lögfræði með viðskiptafræði sem aukagrein frá Háskólanum í Reykjavík árið 2019 og LL.M. námi í hugverka- og tæknirétti frá Trinity College Dublin að því loknu. Hún starfaði áður sem sérfræðingur og aðstoðarmaður framkvæmdastjóra hjá Fulbright-stofnuninni á Íslandi og síðar sem aðstoðarmaður framkvæmdastjórnar og hugverkaráðgjafi hjá Travelshift.
Samhliða námi og starfi hefur Hrafnhildur sinnt ýmsum félagsstörfum og meðal annars setið í lagabreytinganefnd Ungra athafnakvenna (UAK) og í stjórn málfundafélags Lögréttu. Hún hefur einnig mikla reynslu af notkun stafrænna miðla í upplýsinga- og kynningarskyni og samskiptum milli bæði íslenskra og erlendra stofnana og fyrirtækja.
