Katrín Jakobsdóttir, forsætisráðherra og formaður Vinstri hreyfingarinnar græns framboðs, kaus í Hagaskóla í morgun. En hvernig er hefðbundinn kjördagur hjá henni?

„Ég hringi í nokkra ættingja og minni þá á að kjósa. Borða góðan morgunmat sem endist allan daginn. Svo er dagurinn yfirleitt frekar pakkaður – heimsækja kosningaskrifstofur og spjalla við óákveðna kjósendur,“ segir hún.

Dagurinn í dag er síðan skipulagður í þaula.

„Við hjónin förum á kjörstað með þeim börnum sem nenna með – og svo taka við heimsóknir og samtöl við kjósendur. Ég heimsæki kosningakaffi á vegum VG á höfuðborgarsvæðinu og svo verður Kosningavaka VG í Iðnó og þar er ávallt frábær stemmning. Síðan fer ég bæði á Rúv og Stöð 2 í formannapallborð og svo reyni ég að vaka þar til talið hefur verið en oftast sofna ég reyndar yfir tölunum, þetta kemur þegar það kemur,“ segir Katrín.