Þingflokkur Samfylkingingarinnar krefst þess að ríkisstjórnin bregðist strax við því ófremdarástandi sem nú ríkir á Landspítalanum, í ályktun sem send var á fjölmiðla í morgun:
„Starfsfólk lýsir neyðarástandi og á sama tíma krefst ríkisstjórnin milljarða niðurskurðar í rekstri. Það er skammarlegt. Raunverulegt velferðarsamfélag lætur slíkt ekki gerast,“
segir þar meðal annars.
Mikið hefur verið fjallað um vanda bráðamóttöku Landspítalans undanfarið og segja læknar að neyðarástand ríki á vinnustaðnum, sem sé alls ekki búinn undir meira álag. Hefur vöngum verið velt upp hvernig fari ef stórt slys verði, til dæmis rútuslys, því bráðamóttakan sé illa undir slíkt búin.
Þegar hefur að minnsta kosti eitt dauðsfall verið rakið til álagsins á deildinni, þar sem alvarlega veikur maður var sendur heim með ranga greiningu og lést í kjölfarið.
Hefur heilbrigðisráðherra sagt að engar skyndilausnir séu til við vandanum. Vandinn er sagður blanda af skipulagsleysi stjórnenda spítalans, sem og fjársvelti hins opinbera.
Ályktun þingflokksins í heild:
Lýsingar á aðstæðum sjúkra og vinnuumhverfi starfsfólks á bráðamóttöku og öðrum deildum Landspítalans sýna að ástandið þar er ekki sæmandi velferðarsamfélagi eða okkur sem þjóð. Staðan á Landspítalanum er með öllu ólíðandi fyrir sjúklinga, aðstandendur og starfsfólk. Landspítalinn og heilbrigðiskerfið allt býr við langvarandi álag, undirmönnun og fjársvelti. Starfsfólk lýsir neyðarástandi og á sama tíma krefst ríkisstjórnin milljarða niðurskurðar í rekstri. Það er skammarlegt. Raunverulegt velferðarsamfélag lætur slíkt ekki gerast. Í heilbrigðismálum eru Íslendingar eftirbátar hinna norrænu ríkjanna, hvort sem litið er til fjármögnunar eða aðstöðu fyrir sjúklinga og starfsfólk. Stjórnarflokkarnir hafa ítrekað fellt tillögur Samfylkingarinnar um aukin fjárframlög til heilbrigðismála. Kjarasamningar fjölda heilbrigðisstétta hafa verið lausir í meira en níu mánuði. Í þeim hópi eru stórar kvennastéttir, svo sem hjúkrunarfræðingar, lífeindafræðingar, sjúkraliðar, ljósmæður og annað starfsfólk sem heldur daglegum rekstri heilbrigðiskerfisins gangandi. Þessi seinagangur er óásættanlegur. Þingflokkur Samfylkingarinnar krefst þess að ríkisstjórnin bregðist strax við þessu ófremdarástandi.
