Jóna Sólveg Elínardóttir varaformaður Viðreisnar segir að það geti tekið hálft ár að binda krónuna við evru í gegnum myntráð en öruggast sé að miða við eitt til tvö ár frá því að ákvörðun um slíkt sé tekin þangað til búið sé að binda krónuna. Sagði Jóna Sólveig í viðtali í Bítinu á Bylgjunni í morgun að raunhæfast sé að binda krónuna við evru og hugmyndir um að binda krónuna frekar við Bandaríkjadal eða Kanadadollar séu runnar undan rifjum þeirra sem vilji halda krónunni.

Það eru þarna úti aðdáendur þessarar svikulu krónu sem við erum með sem grípa stundum til þessara raka að aðrir gjaldmiðlar séu betri. Það er ekki langt síðan það var talað fyrir Kanadadollar, hann féll svo síðar um heil þrjátíu prósent þannig að ég þakka bara fyrir að við vorum ekki með hann,

sagði Jóna Sólveig. Segir hún það staðreynd að forsendur hér á landi hafi ekkert breyst frá útgáfu skýrslu Seðlabankans árið 2012 sem sagði raunhæfustu kostina fyrir Ísland vera að halda áfram að vera með krónu, taka upp evru eða vera með myntráð:

Við í Viðreisn höfum verið að tala um myntráð, en til lengri tíma erum við að horfa á upptöku evru, en það er eitthvað sem tekur miklu lengri tíma að tala um, að fara inn í Evrópusambandið og taka upp evru.

Þarf ekki að taka langan tíma

Jóna Sólveig segir það ekki þurfa að taka langan tíma að binda krónuna við evru:

Ef það er tekin ákvörðun þá þyrfti það ekki að taka langan tíma. Við erum að tala um hálft ár upp í tvö ár.

Segir hún það koma til með að vera til mikilla hagsbóta fyrir almenning í landinu að binda krónuna með myntráði, þá væri hægt að lækka vexti:

Við erum að borga 5% í vexti af húsunum okkar plús verðtryggingu, fólk úti er að borga 1-2% í vexti og enga verðtryggingu, hvað þýðir þetta? Setjum þetta í samhengi, þetta þýðir að 20 milljón króna lán með sjö prósenta vöxtum kostar um 1,4 milljónir á ársgrundvelli. Daninn borgar 400 þúsund. Við erum að borga heilli milljón meira á ári í húsnæðið okkar bara í vexti og verðtryggingu. Það er mætti bara gera sitthvað fyrir þá upphæð.

Aðspurð um hvers vegna þetta hafi ekki verið gert segir Jóna Sólveig:

Það eru aðilar þarna úti sem eru mjög fastir á því að vera með íslenska krónu. Krónan er sökudólgurinn. Krónan hefur verið þessi sveiflukenndi gjaldmiðill alveg frá upphafi, af hverju erum við með háa vexti og verðtryggingu? Það er til að verjast þessum sveiflum.