Tekin hefur verið ákvörðun um að Sr. Páll Ágúst Ólafsson sóknarprestur í Staðarstaðarprestakalli á sunnanverðu Snæfellsnesi verði færður til í starfi. Hann er ekki lengur sóknarprestur þar. Þess í stað þjónar hann sem héraðsprestur í Vesturlandsprófastdæmi frá 1. júlí þessa mánaðar.

Sr. Hjálmar Jónsson fyrrum Dómkirkjuprestur mun taka við og þjóna Staðarstaðarprestakalli næstu fjóra mánuði þar til boðað verður til nýrra prestkostinga.

Þetta kemur fram í frétt á Facebook-fréttasíðunni Dreifarinn sem segir fregnir af sunnanverðu Snæfellsnesi:

Sr. Hjálmar Jónsson staðfestir í samtali við Eyjuna að honum hafi verið falið að sinna störfum í Staðarstaðarprestakalli næstu fjóra mánuðina.

Sr. Páll Ágúst var kjörinn sóknarprestur í Staðarstaðarprestakalli í nóvember 2013.

Síðan hefur gengið á ýmsu. Prestur gat ekki búið með fjölskyldu sinni í prestbústaðnum á Staðarstað vegna þess að íbúðarhúsið var óíbúðarhæft vegna myglu sem olli veikindum í fjölskyldunni. Gert var við húsið en þrátt fyrir það gat fjölskyldan ekki búið þar eftir að veikindi tóku sig upp að nýju. Sr. Páll flutti með fjölskyldu sinni í Borgarnes og þjónaði sókn sinni þaðan.

Í lok síðasta árs leysti biskup sr. Pál síðan undan búsetuskyldu á Staðarstað. Þetta vakti hörð viðbrögð meðal margra í Staðarstaðarsókn þar sem fólk vildi að prestur væri búsettur í sókninni.

Sjá DV frétt: Harðorð í garð biskups.

Síðan hefur Þjóðkirkjan reynt að fá prestinn til að skila jörðinni en henni fylgja meðal annars tekjur af laxveiði. Hefur staðið í stappi við sr. Pál vegna þessa.