Breska lögreglan segist vita nöfn hryðjuverkamannanna þriggja sem myrtu sjö manns og slösuðu 48, þar af 21 alvarlega, í árásinni sem gerð var í miðborg Lundúna á laugardagskvöld. Vegna rannsóknahagsmuna verða nöfn þeirra þó ekki gefin upp að svo stöddu. Verið er að rannsaka hugsanleg tengsl mannanna við fleiri aðila en hryðjuverkasamtökin sem kenna sig við íslamskt ríki hafa lýst ábyrgð á árásinni. Lögreglan hefur framkvæmt húsleitir í austuhluta Lundúnaborgar og ótiltekinn fjöldi fólks mun vera í varðhaldi.

Allir árásarmennirnir voru skotnir til bana af löreglumönnum. Þrátt fyrir að lögreglan vilji ekki gefa upp nöfn þeirra að svo stöddu þá hafa breskir fjölmiðlar greint frá einum þeirra. Bæði The Times, The Telegraph og Daily Mail segja að sá hafi verið þekktur öfga-íslamisti. Maðurinn hafði tvisvar verið tilkynntur til lögreglu eftir að hafa sýnt af sér athæfi sem benti til þess að hann hneigðist til öfga-íslams.

Maðurinn var 27 ára gamall og tók þátt í því á síðasta ári þegar breska sjónvarpsstöðin Channel 4 gerði heimildamyndina „The Jihadis Next Door,“ um öfgafulla múslima í Bretlandi. Þar sást maðurinn ásamt félögum sínum breiða út fána íslamska ríkisins í Regent’s Park í Lundúnum. Síðan báðust menn fyrir og hlustu á prédikun þar sem meðal annars var boðað að lífið hér á jörð væri einungis millibilsástand á leið til hinnar eilífu sælu í Paradís.

Nú er spurt í Bretlandi hvernig maður á borð við þennan sem þegar var á skrá hjá öryggislögreglu, gat þrátt fyrir heitingar yfirvalda um öryggi og hert eftirlit, komist í þá stöðu að myrða og slasa fjölda fólks í hryðjuverkaaðgerð í miðri höfuðborg landsins.

Írsk skilríki munu hafa fundist á líki annars hinna þriggja hryðjuverkamanna. Sá bjó í Dublin í Írlandi og var af marókkönskum uppruna, skrifar Daily Mail.

Hér má sjá heimildamyndina „The Jihadis Next Door.“ Maðurinn sem bresku blöðin segja hafa tekið þátt í árásinni á laugardag sést ásamt félögum sínum í Regent’s Park á 15. mínútu: