Níu á hverjum tíu Íslendingum ætla í ferðalag í sumarfríinu sínu, eða 91% landsmanna 18 ára og eldri. Það er nokkuð hærra en í fyrrasumar þegar rúm 85% þjóðarinnar ætlaði í ferðalag. Þetta kemur fram í niðurstöðum nýrrar könnunnar MMR.

Örlítið fleiri ætla einungis að ferðast innanlands í ár en í fyrra, eða 37% í ár en 36% í fyrra, en það er innan skekkjumarka. Sömu sögu var að segja um hlutfall þeirra sem ætluðu að ferðast eingöngu utanlands í sumarfríinu en það var 15% samaborið við 14% árið 2016. Þeir Íslendingar sem ætluðu bæði að ferðast innlands sem og utan í sumarfríinu hækkaði upp í 39% samanborið við 35% árið 2016.

Hærri heimilistekjur auka líkurnar á ferðalagi

Þeir sem búsettir voru á landsbyggðinni voru töluvert líklegri en þeir sem búsettir voru á höfuðborgarsvæðinu til þess að ferðast innanlands í sumarfríi sínu, 44% á móti 33%. Aftur á móti voru þeir sem búsettir voru á höfuðborgarsvæðinu líklegri en þeir sem búsettir voru á landsbyggðinni til að ferðast bæði innan- og utanlands, eða 92% á móti 89%.

Því hærri sem heimilistekjur svarenda voru því líklegri voru þeir til að segjast ætla að ferðast, hvort sem það var innan- eða utanlands eða bæði. Þannig sögðust 85% þeirra sem höfðu heimilistekjur undir 400 þúsund ætla að ferðast í sumarfríinu á meðan 95% þeirra með sem höfðu milljón eða meira í heimilistekjur sögðust ætla að ferðast í sumarfríinu. Jafnframt kom í ljós að aldurshópurinn 18-29 ára var líklegri en aðrir aldurshópar til að ferðast bæði innan- og utanlands eða 94%.

Kratar líklegastir til að fara til útlanda

Það reyndist einnig munur á ferðahögum eftir stjórnmálaskoðunum. Þar kom í ljós að stuðningsfólk Vinstri grænna var sá hópur sem líklegastur var til að ferðast einungis innanlands í sumarfríi sínu eða 47%. Þeir hópar sem reyndust ólíklegastir til að ferðast utanlands í sumarfríi sínu voru Vinstri græn, Píratar og Viðreisn, allir jafnir með 10%. Hins vegar voru stuðningsfólk Samfylkingarinnar líklegust til að fara erlendis í sumarfrí eða tæp 19%.

Könnunin var gerð dagana 6. til 14. júní 2017. 974 einstaklingar svöruðu, 18 ára og eldri valdir af handahófi.