„Þegar þú kaupir vöru með korti debet eða kreditkorti greiðir seljandinn 0,4-3,9% til kortafyrirtækisins sem gefur út kortið. Sem sagt af hverjum 1000 krónum sem þú eyðir á kortið þitt fær Borgun og Kreditkort 4 – 39 krónur. Fjármálaráðherra er með þessari aðgerð að auka tekjur kortafyrirtækjana og banka umtalsvert. Ég læt alveg ósagt hversu óheppilegt það er vegna hagsmunatengsla sem leiðtogar þessarar ríkistjórnar hafa við kortafyrirtæki.“

Þetta segir Máni Pétursson útvarpsmaður á X-inu á Fésbók, fer hann hörðum orðum um áform Benediks Jóhannessonar fjármálaráðherra að leggja af 5 og 10 þúsund króna seðlana með það að langtímamarkmiði að draga almennt úr notkun á reiðufé:

Ef maður skoðar þetta síðan útfrá frelsi einstaklingsins. Sem er orð sem íslenskir hægrimenn hafa lengi gjaldfellt. Þá er þetta beinlínis siðlaust. Það er í raun verið að gefa bankafyrirtækjum og kortafyrirtækum leyfi til þess að kortleggja alla okkar neyslu,

segir Máni og bætir við:

Að halda því fram að þetta sé til þess að koma í veg fyrir skattsvik er síðan í raun og veru ógeðsleg árás á alþýðu þessa lands.

Segir Máni að Viðreisn væri nær að skoða íslensk fyrirtæki sem selji auðlindir þjóðarinnar erlendu fyrirtæki sem er í þeirra eigu, það væri heldur ekki vitlaust að skoða ríkisbókhaldið og hvort það sé nauðsynlegt að hafa innmúraða hægrimenn á spena ríkisins, það sé kominn tími til að þeir, líkt og almenningur, séu metnir að eigin verðleikum:

Það hefur alveg farið framhjá mér að eldri borgarinn í einbýlishúsinu sínu sem leigir frænku sinni herbergi á 20 þús sé vandamálið, að píparinn sem lagaði ofnana heima hjá mér og fékk 5 þús kall fyrir sé vandamálið. Meira segja gaurinn sem selur félaga mínum kókaín hann er ekki vandamálið. Það er einmitt enginn þeirra með peningana sína í skattaskjólum þeir eru allir að eyða þeim á íslandi.