Andri Þór Sturluson varaþingmaður Pírata segir að það eina sem fólk sem sé á móti sýnilegum vopnaburði lögreglu geti gert sé að hringja í lögregluna og tilkynna um grunsamlega vopnaða menn. Þegar það sé gert í hvert skipti sem sjáist í lögreglumann vopnaðan byssu þá neyðist ríkislögreglustjóri að endurskoða að hafa vopnaða lögreglumenn á almannafæri. Hefur ríkislögreglustjóri sagt að sýnilega vopnaðir lögreglumenn verði á fjölmennum samkomum í sumar, en mikið hefur verið rætt um vopnaburð lögreglu í litahlaupinu og á þjóðhátíðardaginn.

Það sem við get­um gert sem erum á móti sýni­leg­um vopna­b­urði lög­regl­unn­ar, er að hringja á lög­regl­una og til­kynna grun­sam­lega vopnaða menn alltaf þegar við sjá­um byss­ur, sama hver ber þær. Ef nógu marg­ir hringja stöðugt í Neyðarlín­una vegna ógn­andi manna með skot­vopn þá geta þeir þetta ekki,

skrif­ar Andri Þór, birti hann skrif sín bæði á sinni persónulegu Fésbókarsíðu og á Pírataspjallinu. Hugmynd varaþingmannsins hefur fengið blendin viðbrögð og hefur honum verið bent á að ef neyðarlínan verði teppt í mótmælaskyni þá geti það komið niður á þeim sem þurfa nauðsynlega á þjónustunni að halda. Ekki þarf mikið til, en DV greindi frá því um helgina að maður á níræðisaldri hafi nauðsynlega þurft á Neyðarlínunni að halda en það var ekki svarað fyrst um sinn vegna anna og manneklu, þurftu þeir sem komu að manninum að bíða í 7 mínútur frá fyrsta símtali áður Neyðarlínan svaraði. Andri segir að  algengt sé að mótmælendur hindri framgang lögreglu í hefðbundnari mótmælum og því yrði þetta ekki einsdæmi, mótmælin þurfi heldur ekki að standa lengi:

Spurningin sem við glímum við er hvað er mikilvægt og hvað erum við tilbúin að gera. Í þessari litlu vangaveltu minni myndu 20 mínútur duga til að gera lögregluna afturreka með byssurnar.