Borgarfulltrúar, sem og borgarstjórinn Dagur B. Eggertsson hafa látið í sér heyra í umræðunni um vopnaburð lögreglunnar og eru skoðanir skiptar. Líf Magneudóttir, borgarfulltrúi og forseti borgarstjórnar blandaði sér í umræðuna á dögunum og gefur höfundur Staksteina Morgunblaðsins lítt fyrir röksemdafærslu hennar og segir þau merki um „samskiptaleysi“ innan borgarstjórnar.

Staksteinar dagsins bera titilinn „Ákafur fjandskapur í garð lögreglunnar“ og fær forysta Vinstri hreyfingarinnar græns framboðs að heyra það í pistlinum.

Í umræðum síðustu daga um vopnaburð lögreglunnar hefur enn og aftur opinberast fjandskapur forystumanna VG við lögregluna. Kjörnir fulltrúar VG hafa gripið tækifærið og stigið fram kvartandi undan því að viðbúnaður lögreglu sé of mikill,

skrifar höfundur Staksteina.

Það er mat hans í æsingnum við að koma höggi á lögregluna í landinu hafi Líf Magneudóttir varpað ljósi á „samskiptaleysi“ innan meirihluta Samfylkingar, Bjartrar framtíðar, Pírata og Vinstri Grænna í borgarstjórn og vitnað er til skrifa Lífar á Facebook síðu sinni sem fjallað var um á Eyjunni. Þar sagði hún að borgarfulltrúar hefðu haft veður af því fyrst í fjölmiðlum að til stæði að lögreglan bæri vopn á hátíðahöldum tengdum þjóðhátíðardeginum 17. júní og á tónlistarhátíðinni Secret Solstice sem haldin væri með leyfi borgaryfirvalda.

Það er misskilningur á eðli lögreglusamþykkta að mati höfundar Staksteina að borgin geti haft áhrif á lögreglusamþykktir líkt og Líf nefnir á Facebook og það sé beinlínis rangt hjá henni að fulltrúar í borgarstjórn hafi ekki vitað af því að til stæði að vopnuð gæsla yrði á þessum tilteknu viðburðum. Það hafi forseti borgarstjórnar, S. Björn Blöndal staðfest.

Þetta er sláandi dæmi um hvernig umræðustjórnmálin bera samræðustjórnmálin ofurliði,

segir í niðurlagi Staksteina.