Ólafur Ólafsson athafnamaður og stærsti eigandi Samskipa hefur óskað eftir því að mæta á fund stjórnskipunar- og eftirlitsnefndar Alþingis. Erindi Ólafs barst nefndinni síðasta föstudag og verður tekið fyrir í hádeginu í dag. Fréttablaðið greinir frá þessu í dag, sagði Jón Steindór Valdimarsson þingmaður Viðreisnar að verið sé að skipuleggja málsmeðferðina, hún snúi ekki einungis að skýrslu rannsóknarnefndar Alþingis um aðkomu Hauck & Aufhauser að einkavæðingu Búnaðarbankans heldur einnig gögn sem varða einkavæðingu annarra banka.

Niðurstaða rannsóknarnefndarinnar var afgerandi, stjórnvöld hafi verið skipulega verið blekkt í aðdraganda og kjölfar sölu Búnaðarbankans. Sagði nefndin að ítarleg skrifleg gögn sýndu með óyggjandi hætti að þýski bankinn Hauck & Aufhäuser, Kaupþing hf. á Íslandi, Kaupthing Bank Luxembourg og hópur manna sem vann fyrir og í þágu Ólafs Ólafssonar fjárfestis notuðu leynilega samninga til að fela raunverulegt eignarhald þess hlutar sem Hauck & Aufhäuser átti í orði kveðnu. Í raun var eigandi hlutarins aflandsfélagið Welling & Partners, skráð á Tortóla á Bresku Jómfrúaeyjum. Með fjölda leynilegra samninga og millifærslum á fjármunum, m.a. frá Kaupþingi hf. inn á bankareikning Welling & Partners hjá Hauck & Aufhäuser var þýska bankanum tryggt skaðleysi af viðskiptunum með hluti í Búnaðarbankanum.

Við skýrslutöku í Héraðsdómi Reykjavíkur 30.janúar síðastliðinn sagði Ólafur að hann mundi ekki hver þáttur hans var í tilboðsgerð S-hópsins og samningaviðræðum við íslensk stjórnvöld um kaup hópsins á hlut ríkisins í Búnaðarbankanum:

Þú getur ekki ætlast til þess að ég sé hérna, 15 árum síðar, að svara getgátum fjölmiðla. Bara I‘m sorry,

sagði Ólafur í janúar.

Í yfirlýsingu sem Ólafur sendi frá sér tveimur vikum eftir útgáfu skýrslunnar kom fram að hann telji mikilvægt að „kasta ljósi á þær nýju upplýsingar sem ég hafði ekki fengið aðgang að áður og niðurstöður eru dregnar af í rannsóknarskýrslunni.“

Réttur vettvangur til að bregðast við er að mínu mati fyrir stjórnskipunar- og eftirlitsnefnd Alþingis, enda var niðurstaða rannsóknarnefndarinnar kynnt þar.

Ég geri mér vonir um að varpa þar ljósi á atburðarrásina og svara spurningum sem nefndin kann að beina til mín.