Sextán ára marokkóskum dreng sem kom til Íslands í desember á síðasta ári hefur verið synjað um hæli hér á landi og verður að öllum líkindum vísað úr landi. Lögfræðingur og talsmaður drengsins, Arndís A. K. Gunnarsdóttir hefur kært ákvörðunina til kærunefndar útlendingamála og hefur Ungmennaráð Barnaheilla miklar áhyggjur af málinu.
Rósa Björk Brynjólfsdóttir þingmaður Vinstri grænna vakti athygli á málinu á Alþingi í gær og vísaði til stefnuyfirlýsingar ríkisstjórnarinnar sem kveður á um að mannúðarsjónarmið séu höfð að leiðarljósi við afgreiðslu umsókna um alþjóðlega vernd. Sagði Rósa Björk að það væri hennar skoðun að þingmenn ættu ekki að beita sér fyrir lausn einstakra mála en hún geri undantekningu í þessu tilviki:
Ég get þó ekki orða bundist hér í ræðustól Alþingis í dag yfir umsókn 16 ára drengs frá Marokkó sem kom hingað til Íslands í desember á síðasta ári en hefur verið synjað um hæli. Drengurinn er fylgdarlaust barn samkvæmt skilgreiningu en er hér ásamt eldri bróður sínum sem er 21 árs og vill koma honum í öruggt skjól. Drengurinn er samkynhneigður og í tvöfalt veikri stöðu sem fylgdarlaust barn annars vegar og vegna kynhneigðar sinnar hins vegar,
sagði Rósa Björk og vildi hún fá að vita hvort ríkisstjórnin hygðist standa við sín fögru fyrirheit. Drengurinn er fylgdarlaus samkvæmt skilgreiningu, en er hér ásamt eldri bróður sínum sem er 21 árs og vill koma honum í öruggt skjól. Þar sem systkini yfir 18 ára aldri eru ekki lengur talin fjölskyldumeðlimir yngri systkina sinna hefur bróðirinn ekki forræði yfir drengnum. Bróðirinn sækir einnig um hæli hér á landi og hafa þeir fengið að dvelja saman undir eftirliti Barnaverndar.
Flúði vegna síendurtekins ofbeldis
Drengurinn er samkynhneigður og hefur orðið fyrir síendurteknu ofbeldi í heimalandinu vegna þess og er það meginástæða flótta bræðranna, að því kemur fram í fréttatilkyningu frá hópi almennra borgara sem hefur áhyggjur af málinu. Eftir komuna hingað til lands hefur drengurinn sagt frá kynhneigð sinni og notið stuðnings Samtakanna 78. Talsmaður og lögfræðingur drengsins lýsir stórbættri líðan hans eftir að hann komst í öryggi og getur drengurinn í fyrsta skipti rætt þessi mál og fengið um þau fræðslu og stuðning. Þá hefur formaður Samtakanna 78, María Helga Guðmundsdóttir, tjáð sig opinberlega um málið drengnum til stuðnings.
Spænsk stjórnvöld hafa samþykkt að taka við bræðrunum á grundvelli Dyflinnarreglugerðarinnar. Ekki er þó öruggt að bræðurnir fái hæli á Spáni, sér í lagi sá eldri og óvíst að þeir muni njóta öryggis þar í landi. Tölulegar upplýsingar staðfesta að 99,4 % umsókna um hæli frá Marokkóbúum sé synjað og þeim snúið aftur til heimalandsins frá Spáni. Þá hefur Spánn fengið ávítur fyrir að vísa umsækjendum um hæli frá án þess að umsókn þeirra fái efnislega skoðun.
Arndís ósammála niðurstöðu Útlendingastofnunar
Lögfræðingur bræðranna, Arndís A. K. Gunnarsdóttir, er lögfræðilega ósammála niðurstöðu Útlendingastofnunar, sem er grundvöllur kærunnar til kærunefndar. Þá er drengurinn í tvöfalt veikri stöðu, sem fylgdarlaust barn annars vegar og vegna kynhneigðar sinnar hins vegar. Ísland hefur lögfest Barnasáttmála Sameinuðu þjóðanna og samkvæmt. honum má færa rök fyrir að vegna batnandi hag drengsins hér, sé engin sannfærandi ástæða til að senda drenginn úr landi. Íslensk lög gefa stjórnvöldum rúmar heimildir til að opna mál þeirra beggja hér og veita þeim skjól. Hér, sem endranær, vísa íslensk stjórnvöld í Dyflinnarreglugerðina sem grundvöll þess að senda bræðurna til Spánar í stað þess að afgreiða mál þeirra hér. Eins og ítrekað hefur komið fram er ekkert í þeirri reglugerð sem skyldar eða hvetur til þess að Ísland sendi frá sér flóttafólk og því má frekar segja að hér sé um stefnu og afstöðu stjórnvalda að ræða frekar en lagalega skyldu þeirra.
Fréttaflutningur af stöðu og líðan barna á flótta greinir ítrekað frá miklum kvíða og bágborna aðstoð til að vinna úr miklum vanda sem skapast þegar börn neyðast til að flýja ítrekað og eykur það á öryggisleysi og óvissu, sem er þó mikil fyrir. Jafnvel þótt svo ólíklega vildi til að drengurinn, hvað þá bróðir hans sem hefur tekið mikla persónulega áhættu með því að flýja heimalandið, fengi hæli á Spáni, mun taka við ný atburðarrás sem getur verið erfið fyrir 16 ára barn sem hefur þegar þurft að flýja ítrekað vegna ofsókna. Nýtt tengslanet, nýjar búsetuaðstæður, að öllum líkindum innan hins stóra marokkóska samfélags á Spáni, gætu haft slæm áhrif á andlega líðan drengsins og þær félagslegu framfarir sem hann hefur sýnt eftir komuna til Íslands.
Ungmennaráð Barnaheilla útbjó myndefni
Ungmennaráð Barnaheilla hefur miklar áhyggjur af málinu og hefur undirbúið myndefni, drengnum til stuðnings undir merkjum herferðarinnar #ekkiáokkarvakt sem vinnur gegn brottvísunum flóttabarna í verri aðstæður en boðið er upp á hér á landi:
