Vigdís Hauksdóttir fyrrum þingmaður Framsóknarflokksins var gestur Frosta og Mána í Harmageddon í morgun. Þar bar ýmislegt á góma og ræddi Vigdís meðal annars sjö og hálfs árs þingsetu sína sem Vigdís lýsir sem „herþjónustu“ fyrir Ísland þar sem hún barðist gegn ESB, knésetti Steingrím með IceSave og berjast gegn umbyltingu á stjórnarskránni. Um þennan tíma sinn á þingi segir hún „ég hafði sigur í ansi mörgum málum“.
Aðspurð um það hvers vegna hún tók þá ákvörðun að hætta á þingi segir Vigdís að fjölskyldan hennar hafi tekið þau orð sem látin voru falla um hana inn á sig. Samstarfið á þinginu hafi gengið illa og erfitt sé að ganga um ávallt með bakið í vegginn til að koma í veg fyrir að fá hnífa í bakið og segir:
Ræningjaklíkan sem ræður Framsóknarflokknum í Reykjavík sem var í bakinu á mér, ekki samþingmenn mínir. Svo átti ég alveg gríðarlega öfluga óvini í öðrum flokkum sem sátu með mér á þinginu.
Hver er þín skoðun á þróun flokksins eftir formannsskipti?
Ég lít ekki á að Framsóknarflokkurinn sé stór í dag með 10% fylgi. Framsóknarflokkurinn var stór þegar við unnum kosningasigurinn í Reykjavík 2013.
Vigdís segir að þegar þetta gerðist hafi ákveðnum öflum innan flokksins „liðið illa“ yfir því að vera lítil klíka inn í stórum flokki. Þessi klíka vilji frekar vera stór klíka í litlum flokki og þar sé flokkurinn staddur núna.
Það er það sem er búið að gerast í flokknum og auðvitað sætti ég mig ekkert við það. Framsóknarflokkurinn er að taka niður sinn besta mann. Þeir eru bestir í því Framsóknarmenn að taka niður sína leiðtoga og forystu.
Áttu þar við Sigmund Davíð Gunnlaugsson spyr Frosti og Vigdís játar því. Hún hafi sjálf fengið að kynnast því á eigin skinni, hún hafi notið mikils persónulegs fylgis en sífellt fengið skot innan úr flokknum.
Sigmundur óheppinn að ná sér bæði í sætustu og ríkustu stelpuna á ballinu
Vigdís rifjar upp atvik sem átti sér stað á 1. maí kaffi Framsóknarflokksins í gær þar sem maður gaf sig að tali við hana. Maðurinn var ekki sáttur með þá atburðarrás sem fór af stað í kjölfar birtingu hinna svokölluðu Panamaskjala og sagði við Vigdísi að Sigmundur hefði verið svo „óheppinn að ná sér bæði í sætustu og ríkustu stelpuna á ballinu“ og hafa í kjölfarið þurft að segja af sér úr embætti forsætisráðherra.
Nýr flokkur framundan?
Vigdís segir „allt opið“ hvað varði stofnun nýs flokks með Sigmundi Davíð og Gunnari Braga Sveinssyni en miklar umræður hafa verið um ástandið innan Framsóknarflokksins. Ef að farið væri í slíkar aðgerðir segir Vigdís í Harmageddon að hún yrði lykilmanneskja í því. Það kemur ekki til greina að hennar mati að fara aftur í stjórnmál undir merkjum Framsóknar.
Vigdís segir að hún og Sigmundur hafi knésett hið svokallaða flokkseigendafélag árið 2009. Það sé hins vegar komið aftur og flokkurinn eins og hann var 2007 stjórni nú. Slíku muni hún ekki taka þátt í.
Ég get ekki unnið undir þeim kringumstæðum að það sé óheiðarleiki og spilling og grasserandi einhver undirmál. Út af því til dæmis fór ég og hætti,
segir Vigdís.
Ertu að segja að nýja stjórn Framsóknarflokksins sé í raun bara opin spillingastemning?
Ég ætla að segja ykkur það að sá sem er formaður flokksins í dag hafi látið misnota sig því eðlilegast hafi verið að Sigmundur Davíð Gunnlaugsson fengi að leiða flokkinn áfram í gegnum síðustu Alþingiskosningar.
Núverandi formaður var látinn fara í bakið á Sigmundi Davíð. Hryllilegur kosningaósigur og hann situr enn og hvað?
Hverjir standa að baki því að láta Sigurð Inga Jóhannsson fara í þessa baráttu?
Fáið Sigurð Inga í viðtal og spyrjið hann að því. Ef þið gúglið hverjir sátu við stjórnvölin í Framsóknarflokknum árið 2007 þá finnið þið þetta út.
Vigdís nefnir Jón Sigurðsson fyrrum formann og Jónínu Bjartmarz og aðspurð að því hvort það haldi raunverulega um stjórnartaumana segir hún:
Þetta fólk er búið að taka grímuna af sér og er komið grímulaust fram og stjórnar flokknum í dag. Ég tek ekki þátt í því.
Þess vegna er ég opin fyrir því ef við myndum gera eitthvað sniðugt, ég, Sigmundur Davíð, Gunnar Bragi, Guðfinna og einhverjir fleiri. Við erum bara að pæla í þessu.
