Ekki er annað að sjá en að Íslendingar séu neikvæðir gagnvart hugmyndinni um innheimtu veggjalda til að standa straum af rekstri þjóðvega á Íslandi. Þetta sýnir nýleg könnun MMR.

Á heildina sögðust tæp 56 prósent andvíg veggjöldum. Þar af voru rúm 39 mjög andvíg. Einungis rétt rúm 25 prósent eru fylgjandi og aðeins 6,9 prósent mjög fylgjandi. Hvorki með né á móti teljast vera 18,9 prósent.

Karlar reyndust líklegri en konur til að vera andvígir veggjöldum. Lítill munur var aftur á móti á kynjunum þegar hlutfall þeirra sem sögðust fylgjandi vegtollum er skoðað. Af körlum kváðust 25 prósent vera fylgjandi og 26 prósent kvenna.

Af þátttakendum á aldrinum 18–29 ára kváðust 32 prósent vera hvorki andvíg né fylgjandi veggjöldum. Með auknum aldri jókst hlutfall þeirra sem voru fylgjandi veggjöldum en 29 prósent þátttakenda 68 ára og eldri sögðust fylgjandi.

Íslendingar búsettir á landsbyggðinni reyndust líklegri til að vera andvígir innheimtu veggjalda heldur en íbúar höfuðborgarsvæðisins.

Tekjuminna fólk virðist ívið meira á móti veggjöldum en þeir sem eru tekjuhærri.

Ef fylgi við veggjöld er skoðað út frá því hvaða stjórnmálaflokka fólk segist hliðhollt þá reyndist stuðningsfólk Pírata og Samfylkingarinnar töluvert líklegri en stuðningsflokk annarra flokka til að vera mjög andvíg innheimtu veggjalda. Stuðningsfólk Viðreisnar reyndist aftur á móti mun líklegra en stuðningsfólk annarra flokka til að vera frekar eða mjög hlynnt veggjöldum eða 45 prósent.

Birtist í landshlutafréttablaðinu Vesturlandi. Það má lesa á netinu með því að smella á hér fyrir neðan: