Sigmundur Davíð Gunnlaugsson þingmaður Framsóknarflokksins segir að helstu staðreyndir um yfirtöku vogunarsjóða á Arion Banka séu enn á huldu og spyr hvort það þurfi að bíða í hálfan annan áratug eftir rannsóknarskýrslu Alþingis eftir svörum.

Segir hann að atburðarrásin sem stjórnvöld hafi lýst í upphafi standist ekki skoðun og að þingsályktunartillaga um nýtingu forkaupsréttar ríkisins hafi verið látin hverfa.

Á Fésbók í dag spyr Sigmundur, í tilefni af því að sjö þingfundardagar eru fram að þingslitum, fimm spurninga sem á enn eftir að svara:

-Veittu stjórnvöld heimild til að styðjast við gamalt uppgjör bankans og sniðganga þannig forkaupsrétt ríkisins?

-Ef forkaupsréttur er ekki lengur virkur hver tók þá ákvörðun um að falla frá honum fyrir hönd ríkisins?

-Komið hefur fram að kauptilboð vogunarsjóðanna var með fyrirvörum. Hverjir voru þeir? Snéru þeir að því að stjórnvöld myndu aflétta höftum af aflandskrónum? Ræddu íslensk stjórnvöld við vogunarsjóðina um að losa höft og falla frá forkaupsrétti svo að sjóðirnir gætu fært bankann til sín á lágmarksverði (á kostnað ríkisins)?

-Eru stjórnvöld einhverju nær um hverjir standa á bak við kaupin og í hvaða tilgangi?

-Tímalínan sem dregin var upp stenst ekki. Tilboð um kaupin virðist hafa verið samþykkt 12. febrúar en það var fyrst upplýst um það (með þátttöku tveggja ráðherra) 19. mars. Var markaðurinn blekktur um raunverulegt eignarhald í 5 vikur?

Segir Sigmundur að spurningarnar varði framtíð íslenska fjármálakerfisins og tugmilljarða hagsmuni ríkissjóðs. Spyr hann að lokum:

Á að bíða þar til of seint verður að gera nokkuð í málinu og láta nægja að skrifa um það rannsóknarskýrslu eftir 10-15 ár?