Formenn Læknafélags Íslands og Læknafélags Reykjavíkur gagnrýna landlækni harðlega fyrir ummæli sem hann lét falla fyrr í vikunni og segja þau sérfræðilækna eiga skilið afsökunarbeiðni frá Birgi Jakobssyni landlækni.
Haft var eftir Birgi í Fréttablaðinu í gær að vera sérfræðilækna á einkareknum stofum utan Landspítalans væri ógn við öryggi sjúklinga:
Við erum með kerfi sem gerir það að verkum að sérfræðingar og læknar dragast frá Landspítala í stofupraxís í of miklum mæli að mínu mati sem þýðir að sérfræðingar verja of litlum tíma á LSH. Þar með er öryggi sjúklinga stofnað í hættu,
sagði Birgir. Birgir hefur lengi talað fyrir því að læknar á Landspítala eigi ekki að vera í hlutastarfi á stofum úti í bæ en læknar hafa hingað til ekki tekið undir með landlækni. Arna Guðmundsdóttir formaður LR er mjög ósátt við ummæli landlæknis:
„Það stenst enga skoðun að sérfræðilæknar utan sjúkrahússins séu ógn við sjúklinga á LSH. Að mínu mati eru þessi ummæli röng og sérfræðilæknar á einkastofum eiga skilið afsökunarbeiðni frá landlækni,“
sagði Arna í samtali við Fréttablaðið í dag, sagði hún í viðtali við Eyjuna fyrr á þessu ári að hún væri ósammála landlækni um að best sé að læknar á Landspítalanum séu þar í fullu starfi. Þorbjörn Jónsson formaður Læknafélags Íslands tekur í sama streng og Arna, ummæli landlæknis séu röng og óheppileg:
Mér finnst það ábyrgðarhluti af landlækni að taka svo djúpt í árinni. Landlæknir er í ákveðinni stöðu og orð hans hafa mikið vægi í íslensku heilbrigðiskerfi. Þess vegna skiptir miklu máli að tala af ábyrgð og rökstyðja mál sitt vandlega. Ég tel ummæli hans órökstudd og ekki til þess fallin að bæta íslenskt heilbrigðiskerfi.
Landlæknir hefur ekkert á móti aðgerðum úti í bæ
Sérfræðilæknar hafa gagnrýnt landlækni harðlega undanfarin misseri, sagði Steinn Jónsson, læknir og fyrrverandi formaður Læknafélags Reykjavíkur meðal annars í grein í Morgunblaðinu nýverið að landlæknir sýndi kollegum sínum „fullkomna fyrirlitningu“ og að þeir sem þekki til sérfræðilæknisþjónustu á Íslandi viti að hér sé um að ræða hagkvæmasta og skilvirkasta þáttinn í heilbrigðiskerfinu hér á landi:
Það er samdóma álit þeirra lækna sem hafa rætt við landlækni um sérstöðu Íslands í heilbrigðismálum að hann hafi ekki minnsta áhuga á að setja sig inn í þá hluti eða skoða ástæðurnar fyrir því að Ísland stendur jafn vel og raun ber vitni. Málflutningur hans einkennist af stóryrðum og sleggjudómum,
sagði Steinn. Birgir sagði í samtali við Eyjuna síðasta haust að hann hafi ekkert á móti því að aðgerðir séu gerðar úti í bæ, en lausnin sé að gera allt kerfið hvetjandi, nú sé staðan sú að sérfræðilæknar fái borgað eftir afköstum á meðal Landspítalinn fær eina stóra summu árlega:
Ég hef ekkert á móti því að gera aðgerðir úti í bæ, það sem ég er að gagnrýna eru greiðslukerfin á Íslandi. Fjárlög fyrir opinbera kerfið, það er lamandi greiðslukerfi þar sem þú færð ákveðinn peningapoka og þú sparar mest með því að gera sem minnst.
