Áhrifamenn innan Framsóknarflokksins eru sagðir vilja Sigmund Davíð Gunnlaugsson, þingmann og fyrrverandi forsætisráðherra, í framboð í borgarmálin og að hann leiði lista Framsóknarflokksins og flugvallarvina í næstu sveitastjórnarkosningum en þær fara fram í maí á næsta ári. Sigmundur Davíð segir rétt vera að þetta hafi verið rætt við hann. Hann er nú þingmaður og situr í utanríkismálanefnd en hann hefur lengi haft áhuga á skipulagsmálum og hefur látið í sér heyra varðandi skipulagsmál í miðborginni.

Fréttablaðið skýrir frá þessu í dag.  Þar er haft eftir Sigmundi að það sé ekkert launungarmál að hann hafi mikinn áhuga á málefnum sveitarfélaganna og skipulagsmálum.  Hann tók einnig fram að hann hafi skyldum að gegna við kjördæmi sitt sem þingmaður og geri ráð fyrir að halda sig við landsmálin. Hann sagði einnig að málefni sveitarfélaganna og skipulagsmál tengist landsmálunum en á því sviði sé margt sem honum finnist þörf á að bæta.

Sigmundur Davíð hefur ekki legið á skoðunum sínum hvað varðar skipulagsmál og viðraði meðal annars skoðanir sínar á þeim á meðan hann gegndi embætti forsætisráðherra.