Meirihluti Pírata vill taka á móti fleiri flóttamönnum, en fáir stuðningsmenn Sjálfstæðisflokksins og Framsóknar flokksins. Þetta kemur fram í niðurstöðum nýrrar könnunar MMR sem birtist í dag um afstöðu fólks til fjölda flóttamanna sem fá hæli hér á landi. Athygli vekur að svarendur skiptust mjög eftir aldri í svörum sínum. Karlar eru líklegri til að telja að tekið sé á móti of mikið af flóttafólki og menntunarstig hefur einnig mikil áhrif á svör.
Könnunin fór fram dagana 10. til 15. febrúar og tóku 908 manns þátt í henni, 18 ára og eldri.
Ef svör eru skoðuð eftir kynjum kemur í ljós að 28% karla telja að tekið sé við of mikið af flóttafólki en 20% kvenna. Konur eru mun líklegri til að telja að hæfilegum fjölda sé veitt hæli hér en helmingur þeirra telur að svo sé en aðeins 40% karla. Alls sögðust 32% karla vilja að fleiri flóttamenn fái að koma til Íslands og 30% kvenna.
Aldursskiptingin var einnig skýr í svörum fólks. Fólk á aldrinum 50-67 ára var mun líklegra en aðrir aldurshópar til að telja tekið við of mikið af flóttafólki eða 35%. Í hópi þeirra sem voru 68 ára og eldri var stærstur hluti eða 54% þeirrar skoðunar að magnið væri hæfilegt. 37% svarenda á aldrinum 18-29 ára voru þeirrar skoðunar að tekið væri við of fáu flóttafólki, einungis prósentustigi meira en í aldurshópnum 30-49 ára.
Búseta hefur ekki mikil áhrif annað en menntun
Þegar svör eru skoðuð eftir búsetu kemur í ljós að svipaður fjöldi höfuðborgarbúa (43%) og landsbyggðarbúa (48%) telur að hæfilegur fjöldi flóttafólks fái að setjast hér að. Af höfuðborgarbúum telja 33% að taka eigi við fleiri flóttamönnum en aðeins 26% landsbyggðarbúa.
Svör fólks voru mjög mismunandi eftir menntunarstigi. Af þeim sem lokið höfðu grunnskólaprófi sögðust 38% of mikið af flóttafólki fá að koma til Íslands en aðeins 9% þeirra sem lokið höfðu háskólaprófi. Helmingur háskólamenntaðra vill að tekið sé við fleirum en aðeins 15% þeirra sem lokið hafa skyldunámi.
Afar fáir kjósendur Framsóknar og Sjálfstæðisflokks vilja fleiri flóttamenn til landsins
Skoðanir eru sömuleiðis mjög skiptar eftir stjórnmálaskoðunum. Aðeins 7% stuðningsfólks Framsóknar og 8% stuðningsfólks Sjálfstæðisflokksins telja að taka eigi við fleiri flóttamönnum. 36% kjósenda Framsóknar segja að of margir fái að koma hingað og 34% kjósenda Sjálfstæðisflokks.
Heil 57% kjósenda Pírata eru þeirrar skoðunar að taka skuli við fleiri flóttamönnum. Aðeins 12% kjósenda þeirra telur fjöldann of mikinn. Kjósendur Bjartrar framtíðar eru þar næst á eftir en 52% þeirra vilja fá fleiri flóttamenn til landsins, síðan koma Vinstri grænir þar sem helmingur svarenda vill fá fleiri flóttamenn og 46% kjósenda Samfylkingarinnar. Af kjósendum Viðreisnar vilja 41% fá fleiri flóttamenn til landsins.
