Atvinnulausum fjölgaði um 2.600 manns í janúar, á sama tíma jókst fjöldi starfandi landsmanna um 1.400 manns. Hlutfall starfandi af mannfjölda var 77,1% og hlutfall atvinnulausra af vinnuafli var 4,1% í janúar. Þetta kemur fram í vinnumarkaðsrannsókn Hagstofu Íslands.

Í janúar var að jafnaði 193.100 manns á aldrinum 16–74 ára á vinnumarkaði í janúar 2017, sem jafngildir 80,3% atvinnuþátttöku. Af þeim voru 185.300 starfandi og 7.900 án vinnu og í atvinnuleit. Þegar búið er að leiðrétta tölurnar yfir atvinnuleysis vegna árstíðabundinna þátta var atvinnuleysi í janúar 3,6%.

Samkvæmt árstíðaleiðréttingu var fjöldi fólks á vinnumarkaði 199.600 í janúar 2017 sem jafngildir 82,7% atvinnuþátttöku, sem er lækkun um 1,3 prósentustig frá desember 2016. Fjöldi atvinnulausra í janúar var samkvæmt árstíðaleiðréttingunni 7.300 og hefur fjölgað um 1.400 manns frá áætluðum fjölda atvinnulausra í desember. Hlutfall atvinnulausra hækkaði því á milli desember 2016 og janúar 2017 eða um 0,6 stig, úr 3,0% í 3,6%. Leiðrétt hlutfall starfandi fólks í janúar 2017 var 79,7%, sem er 1,8 stigum lægra en í desember. Þegar horft er til síðustu sex mánaða þá sýnir leitni vinnuaflstalna að atvinnuleysi stendur í stað, en á síðustu tólf mánuðum hefur það lækkað lítillega eða um 0,2 prósentustig. Hlutfall starfandi síðustu sex mánuði hefur lækkað lítillega eða um 0,3 stig, en aftur á móti aukist um 0,7 stig þegar horft er til þróunar síðustu tólf mánaða.