„Við höfum náttúrulega varið miklum tíma í að koma á framfæri röksemdum og sjónarmiðum sem varða fjárhag eldra fólks. Það hefur verið misjafnlega tekið undir það og stundum blöskrar manni hversu kaldrifjuð pólitíkin getur verið þegar kemur að málefnum eldra fólks“, segir Ellert B. Schram, fv. alþingismaður og ritstjóri DV, en hann er nýkjörinn formaður Félags eldri borgara.

Ellert segist þeirrar skoðunar að það eigi ekki að gilda neinar takmarkanir á því hversu mikla peninga eldri borgarar sem eru á vinnumarkaði vinni sér inn. „Það á ekki að vera neitt frítekjumark og þeir sem hafa lægstu eftirlaunin frá Tryggingastofnun eiga ekki að borga af þeim skatt“, segir hann.

„Þetta er svo lág upphæð,“ segir hann í samtali við vefinn Lifðu núna. Varðandi viðbótartekjur sem eldri borgarar vinna sér inn, telur Ellert eðlilegt að þeir greiði af þeim skatt, á sama hátt og aðrir sem vinna fyrir viðbótartekjum.

„Ég hef hvorki sóst eftir að fara í stjórn félagsins né að verða formaður stjórnarinnar, en er glaður og þakklátur fyrir að fólk skuli treysta mér fyrir þessu. Ég mun gera mitt besta, það er ekki á hverjum degi sem svona gamall maður er beðinn um að verða formaður í svona stóru félagi, með rúmlega 10.000 félagsmenn. Þetta er líklega Íslandsmet“, segir Ellert og hlær. „Úr því menn vilja hafa mig í forystunni finnst mér skylda mín að verða við því. Mér finnst ég þannig vera ákveðin fyrirmynd, fólk er ekki dottið út og komið fram yfir síðasta söludag þó það sé komið á  áttræðisaldur“.

Ellert segir að Félag eldri borgara eigi ekki að merkja sig ákveðnum stjórnmálaflokki og þurfi að vera í góðu sambandi við stjórnvöld. „Við þurfum að reyna að koma málstað þeirra öldruðu á framfæri  og leysa þau viðfangsefni sem við er að glíma í sátt og með stuðningi allra þeirra flokka sem eiga sæti á Alþingi og í sveitarstjórnum,“ segir hann.

Ekki megi ekki gleyma þeim sem eru komnir á efri ár, þó þeir séu hættir að vinna og hættir að taka þátt í samfélaginu. „Þetta fólk er búið að skila sínu og í dag er þetta kynslóðin sem gerbreytti íslensku samfélagi,“ segir Ellert.