Sigmundur Davíð Gunnlaugsson þingmaður Framsóknarflokksins segir að Þorsteinn Víglundsson félagsmálaráðherra þurfi að losna við „hina sérkennilegu fordóma í garð landbúnaðar“. Líkt og Eyjan greindi frá í gær sagði ráðherra að tímabært væri að horfast í augu við þann mikla kostnað sem vernd gagnvart samkeppni á landbúnaðarafurðum valdi íslenskum neytendum og það væri löngu tímabært að breyta fyrirkomulaginu. Sagði Þorsteinn að innkoma Costco á íslenskan markað hafi sýnt að erlend samkeppni veiti innlendum aðilum nauðsynlegt aðhald, lækki vöruverð og tryggi meira vöruúrval.
Sjá einnig: Þorsteinn vill Costco-áhrif á íslenskan landbúnað
Sigmundur Davíð segir í færslu á Fésbók að það sé „alveg merkilegt hvað sumir loka augunum fyrir heildarmyndinni þegar þeir fjalla um landbúnað“:
Félagsmálaráðherra hefur tekið U-beygju í nokkrum stórum málum frá því í fyrra lífi sínu hjá SA. Nú þarf hann að fara að losna við hina sérkennilegu fordóma í garð landbúnaðar. Hvers vegna tekur ráðherra félagsmála allt í einu upp á því að hvetja til verksmiðjuvæðingar landbúnaðar og aukins innflutnings?,
spyr Sigmundur. Þorsteinn tali um almannahagsmuni og verðlag en gleymi að það sé stutt síðan að innlend matvæli héldu aftur af verðbólgu:
Ráðherrann virðist vera búinn að gleyma að það er stutt síðan innlend matvæli héldu aftur af verðbólgu samanborið við þau innfluttu og það er líka stutt síðan matvara var að jafnaði ódýrari á Íslandi en í Evrulandi. Síðan þá hefur krónan hins vegar styrkst mikið og vöxtum verið haldið óskiljanlega háum. Ef landið væri rekið meira eins og gott bú væri þetta ekki vandamál.
Auk þess tekur ráðherrann ekki verðmæti þúsunda starfa, undirstöðu byggðar í kringum landið, umhverfismála, menningar og meira en 1100 ára sögu með í reikninginn. Slík verðmæti virðast ekki passa inn í almannahagsmunatöflureikni ráðherrans.
