Þingmenn Pírata og Sjálfstæðisflokks, þeir Smári McCarthy og Teitur Björn Einarsson, eru sammála um að hugmynd Benedikts Jóhannessonar fjármála- og efnahagsráðherra um að leggja 10.000 og 5.000 króna peningaseðlum sé röng og galin. Segir Teitur Björn að besta ráðið gegn skattsvikum sé að hafa skatta lága og skattkerfið gegnsætt og skilvirkt.
Meðal tillagna í skýrslu starfshóps ráðherra sem kynnt var í morgun var að draga úr noktun peningaseðla og taka 10.000 króna og 5.000 króna seðla úr umferð, þar að auki verði sett hámarksupphæð á vörur og þjónustu sem má kaupa með reiðufé.
Teitur Björn segir á Fésbók að þetta sé galin hugmynd:
Mikilvægt er að berjast gegn skattsvikum með öllum tilhlýðilegum ráðum. Besta ráðið til þess er að hafa skatta lága og almenna og skattkerfið gegnsætt og skilvirkt. Að banna fólki að stunda viðskipti sín á milli með lögeyri útgefnum af ríkinu sjálfu er kolröng nálgun og hreinlega galin hugmynd.
Smári McCarthy þingmaður Pírata tekur í sama streng:
Þessi hugmynd er galin, og heldur ekkert ný. Modi reyndi þetta á Indlandi, og varð til þess að grafa undan fjárhagslegum stöðugleika tugmilljóna Indverja og skapa uppnám á mörkuðum, sem dró úr hagvexti í Indlandi um 0.4% (sem er heilmikið!). Þetta var líka reynt í Louisiana fylki Bandaríkjanna til að stemma stigu við þjófnaði á brotajárni, en bannið var afnumið stuttu síðar vegna þess að þetta hafði gríðarlega neikvæðar afleiðingar fyrir strangheiðarlegt fólk sem vildi bara geta stundað eðlileg viðskipti.
Stríð gegn skattsvikum endar eins og stríðin gegn fíkniefnum og hryðjuverkum
Telur Smári upp nokkra punkta sem hann telur mikilvæga í þessu samhengi, í fyrsta lagi myndu einkaaðilar sem sjá um greiðslumiðlun hagnast á þessum aðgerðum, í öðru lagi dragi þetta athyglina frá stórtækari skattsvikum:
„Þetta dregur alveg athyglina frá því að minniháttar aðilar standa ekki fyrir nema lítið brot af þeim skattsvikum sem eru til staðar í kerfinu; áherslan á að vera á Panamaprinsa og aðra stórtæka skattsvikara,“
segir Smári. Þar að auki geti skattaundanskot átt sér stað með bankamillifærslum sem séu svo smáar að lítið vit sé í að rannsaka þær, því myndi bannið minnka getu fólks til að eiga eðlileg viðskipti undir nafnleynd:
Bann við stórar greiðslur í reiðuféi mun ekki stoppa þá sem vilja greiða með reiðuféi fyrir stóra hluti ─ eins og einhver benti á mun stríð gegn skattsvikum enda á sama hátt og stríð gegn hryðjuverkum og stríð gegn fíkniefnum. Það eru fyrst og fremst þeir sem ætla að gefa peninga í fermingargjöf, þeir sem vilja lána vini sínum skotsilfur yfir helgina, þeir sem vilja kaupa notaðan barnavagn af nágrannanum, og þeir sem vilja setja nokkra seðla undir koddann til að spara fyrir utanlandsferð sem munu tapa á þessu.
Ef Benedikt hefði raunverulegan áhuga á því að stöðva skattsvik, þá væri áherslan á að bæta skattaeftirlit og fjármálaeftirlit, með auknu fjármagni til Ríkisskattstjóra, Skattrannsóknarstjóra Ríkisins, Fjármálaeftirlitsins, og til Héraðssaksóknara.
