Gunnar Bragi Sveinsson þingmaður Framsóknarflokksins og fyrrum utanríkisráðherra til þriggja ára lýsir vanþóknun á ummælum ýmissa borgarfulltrúa meirihlutans í Reykjavík á því hvernig þeir hafi tjáð sig um vopnaburð og aðrar öryggisráðstafanir lögreglu í ljósi hryðjuverkahættu undanfarið.

Þetta var meðal þess sem kom fram í viðtali sem Magnús Þór Hafsteinsson ritstjóri landshlutafréttablaðsins Vesturlands átti við Gunnar Braga í vikulegum þætti Magnúsar Þórs í síðdegissendingu Útvarps Sögu í gær. Þar voru öryggismálin í ljósi hryðjuverkahættu meðal þess sem kom til umræðu.

Mér finnst algerlega fáránlegt að lesa og heyra og sjá hvernig sérstaklega ákveðnir aðilar hér hjá Reykjavíkurborg hafa verið að skrifa og fjalla um þessi mál. Þetta er svo með ólíkindum að maður getur ekki ímyndað sér í hvaða heimi þetta fólk býr í rauninni. Það er ekki hægt að segja þannig að ekkert komi fyrir á Íslandi.

Gunnar Bragi er ekki síst ósáttur vegna ummæla Lífar Magneudóttur forseta borgarstjórnar og borgarfulltrúa Vinstri grænna á Facebook og Eyjan greindi frá í gær. Forseti borgarstjórnar Reykjavíkur skrifaði:

Sérsveitarmaður með byssu á engu eftir að breyta ef einhver hefur einbeittan vilja til að valda fólki skaða. Nærtækara væri að setja saman teymi áfallastreitusérfræðinga eða hjálparsveitarmanna til að stíga inn í ófremdarástand og hryðjuverk. Gerði meira gagn en sérsveitarmaður með byssu.

Þingmaðurinn og utanríkisráðherrann fyrrverandi sagðist ekki vilja kasta rýrð á fólk á borð við sálfræðinga þó hann spyrði:

…hvernig ætli þeim hefði gengið að fara inn í hnífabardagann í London um daginn?

Svo bætti hann við:

Þetta er svo fáránlegt að borgarfulltrúi, einhver manneskja sem á vera ábyrgðarfull…, að láta svona út úr sér er með ólíkindum. Það er fyrir neðan allar hellur.

Ber fullt traust til stjórnenda öryggismála

Gunnar Bragi sagðist telja að öryggsmál almennra borgara á Íslandi væru í góðum höndum, hvort heldur það væri ríkislögreglustjóri eða Landhelgisgæslan eða aðrir sem sinntu því.

Þetta er mikið fagfólk sem gætir öryggi okkar eins og þau mögulega geta. Ég dáðist að þessum mönnum hvernig þeir unnu þegar maður fékk að kynnast því,

sagði Gunnar Bragi og átti þá við þann tíma þegar hann var utanríkisráðherra. Hann bætti við sér þætti gaman að segja frá því að erlendir aðilar sem hefðu átt í samstarfi við íslenskar öryggisstofnanir hefðu ávallt í samtölum við utanríkisþjónustuna, meðan hann var ráðherra málaflokksins, hrósað Íslendingum sem að þessu störfuðu og gefið þeim sín bestu meðmæli.

Varðandi hugsanlegar ógnir sagði Gunnar Bragi að Íslendingar gætu ekki leyft sér að stinga hausnum í sandinn þegar kæmi að slíku.

Ég treysti fullkomlega þessum aðilum sem fara með þessi mál hérna á Íslandi til þess að vega og meta hvort það eigi að bera vopn eða ekki. Ég vil miklu frekar að menn séu sýnilegir og beri þá vopnin telji þeir að það sé ástæða til þess, heldur en að þeir geri það ekki.

Gunnar Bragi Sveinsson sagði að við yrðum einfaldlega að treysta þeim sem hafa upplýsingar, hafa tæki og tól til þess að vega og meta ástandið á hverjum tíma, til þess að bregðast rétt við.

Ég eða einhver borgarfulltrúi getum ekkert sagt hvort að það sé aukin áhætta eða ekki, hvort að hættustig sé lítið eða lágt. Það eru bara ákveðnir ferlar sem eru í gangi til þess að meta slíkt, það er ágætt samstarf við erlend ríki [á sviði öryggismála].

Aðspurður að því hvort hann teldi að lögreglan hefði undir höndum einhverjar upplýsingar um mögulega ógn sem ylli hertum viðbúnaði sagðist Gunnar Bragi ekki vita neitt um það.

Ég vona bara að lögreglan viti nógu mikið og vil ekkert vita hvað hún veit.

Hér má hlusta á viðtalið við Gunnar Braga á Útvarpi Sögu í gær. Rætt var um öryggismálin í lok þáttarins: