Sveitarfélögin á höfuðborgarsvæðinu vinna að því að koma á fót nýju almenningssamgöngukerfi, sem kallast Borgarlína. Áform sveitarfélaganna er að tillaga liggir fyrir um mitt þetta ár og ákvörðun verði tekin í mars 2018. Fyrsti áfangi Borgarlínu er áformaður í notkun árið 2022 og fullgerð verður Borgarlínan 2040. Gert er ráð fyrir að Borgarlína verði 40 km kerfi af annaðhvort léttlestum eða hraðvögnum. Tilgangurinn er að auka hlut almenningssamganga í umferðinni úr 3% í 12%. Búist er við því að íbúum svæðisins muni fjölda um 70.000 manns á næstu 25 árum. Samkvæmt upplýsingum Reykjavíkurborgar er kostnaður áætlaður á þessu stigi 70 – 150 milljarðar króna. Samgöngustjóri Reykjavíkurborgar Þorsteinn R. Hermannsson hefur kynnt að miðað við reynslutölur erlendis megi ætla að léttlestakerfið kosti um 195 milljarða króna. Fyrsti áfangi þessara framkvæmda, sem ætlað er að evrði tilbúinn eftir 5 ár er talinn kosta 30 – 65 milljarða króna.
Önnur stór áform í samgöngumálum höfuðborgarsvæðisins er svonefnd Fluglest, lestarsamgöngur milli Keflavíkurflugvallar og Reykjavíkur. Til eru áætlanir um kostnað sem ber nokkuð saman. Samkvæmt þeim kostar Fluglestin liðlega 100 milljarða króna. Áætlað er samkvæmt upplýsingum Runólfs Ágústssonar, framkvæmdastjóra Fluglestarinnar að tengja saman Fluglestina og Borgarlínuna.
Í þriðja lagi er Samgönguráðherra að láta skoða kostnað við helstu vegaframkvæmdir í og við höfuðborgarsvæðið sem talin er brýn þörf á. Kostnaður við þær eru metin upp á 100 milljarða króna. Langstærst er Sundabrautin sem mun ekki kosta undir 50 milljörðum króna. Fyrsti áfangi hennar er raunar innanbæjartenging í Reykjavík þar sem Grafarvorgurinn er tengdur við Sundin blá með nýjum vegi yfir voginn. Kostnaður við hann er um 27 milljarðar króna.
Samtals eru þessi áform talin kosta 270 – 350 milljarða króna. Þá er ótalinn kostnaður vegna flugsamgangna. Ef framtíðarmillilandaflugvöllur verður ekki áfram í Keflavík heldur færður nær Reykjavík kann það að breyta áformum um Fluglestina. En verði hlutverk Keflavíkurflugvallar óbreytt þarf engu að síður að leggja út í tugmilljarða króna kostnað til þess að koma aðstöðu til innanlandsflugs úr þeirri forneskju sem uppi er með nýjum mannvirkjum og/eða flugvelli. Í kynntum tillögum um Borgarlína kemur skýrt fram að flugvöllurinn í Vatnsmýrinni á að hverfa og nota það land um byggingar.
Lítið hefur verið gert grein fyrir því hvernig kosta eigi Borgarlínuna, en þó virðist ljóst að fyrst og fremst verður sótt í ríkissjóð. Fluglestina er áformað greiða með gjöldum notenda. Engin athugun liggur fyrir á greiðsluvilja flugfarþega en í kostnaðaráætlunum er stuðst við erlendar forsendur og þær yfirfærðar á Keflavíkurflugfarþega. Vegaframkvæmdirnar í og kringum höfuðborgarsvæðið eiga að greiðast úr ríkissjóði en Samgönguráðherra hefur hug á að innheimta veggjöld að einhverju leyti, en það er óljóst enn sem komið er. Heildarkostnaðurinn er gríðarlegur og jafngildir 30 Dýrafjarðargöngum og það mun taka a.m.k. hálfa öld að greiða hann miðað við framlög til stofnframkvæmda um þessar mundir.
Aðalfundur SSH 2016 var haldinn í Kópavogi 2. desember sl.
Aðalviðfangsefni fundarins voru almenningssamgöngur á höfuðborgarsvæðinu, og einkum og sérílagi „Borgarlínan“ nýtt hágæða almenningssamgöngukerfi fyrir höfuðborgarsvæðið sem nú er í mótun. Á fundinum var undirritað samkomulag aðildarsveitarfélaganna um samstarf um næstu skref við undirbúning að innleiðingu Borgarlínunnar, en stefnt er að því að um mitt næsta ár liggi fyrir endanlegar tillögur um legu línunnar, og að lokið verði undirbúningi að stofnun sérstaks félags um uppbyggingu innviða sem tengjast línunni.
Undirritun samnings, Áslaug Hulda Jónsdóttir, f.h. Garðabæjar, Haraldur Sverrisson, f.h. Mosfellsbæjar, Dagur B. Eggertsson, f.h. Reykjavíkurborgar, Ásgerður Halldórsdóttir, f.h. Seltjarnarness, Ármann Kr. Ólafsson, f.h, Kópavogs og Haraldur L. Haraldsson, f.h. Hafnarfjarðar
