Bjarni Benediktsson forsætisráðherra segir að hugur sinn sé hjá þeim sem hafa misst ástvini, eru slasaðir og hjá breskum almenningi. Þetta kemur fram í færslu á Twitter sem birtist í nótt vegna atburðanna í Manchester á Englandi. 22 liggja í valnum og tugir liggja slasaðir eftir sprengingu í tónleikum Ariönu Grande á Manchester Arena-tónleikahöllinni í gærkvöldi.

Ekkert getur skýrt viljann á bak við það að ráðast á saklaust fólk, börn, táninga og foreldra þeirra, eins og var gert í Manchester í gærkvöldi,

segir Bjarni á texta sem hann sendi frá sér á ensku á Twitter:

„Engin orð geta lýst afleiðingunum. Sorginni og sálarkvölunum. Minn hugur og samúð er hjá þeim sem hafa misst ástvini, hjá þeim sem slösuðust og hjá bresku þjóðinni.“

My thoughts are with those that have lost, those that are injured, and with the British people #Manchester pic.twitter.com/mRjDnKFcPf

— Bjarni Benediktsson (@Bjarni_Ben) May 23, 2017

Guðlaugur Þór Þórðarson utanríkisráðherra sagði svo á Fésbók í morgun:

Það er hræðilegt til þess að hugsa að voðaverkunum í Manchester hafi verið beint að ungu fólki sem naut lífsins á tónleikum. Hugur minn og okkar er hjá þeim sem eiga um sárt að binda og bresku þjóðarinnar allrar.