Ákveðið var á miðstjórnarfundi Framsóknarflokksins um helgina að flokksþingi Framsóknarmanna verði flýtt til janúar 2018, en upphaflega stóð til að halda flokksþingið um haustið. Því fagnaði Sigmundur Davíð Gunnlaugsson þingmaður flokksins og sagði hann það mikinn sigur en hann mun líklega freista þess að fella Sigurð Inga Jóhannsson formann, sem felldi Sigmund Davíð eftirminnilega úr formannsstólnum síðasta haust.
Sagði Sigmundur í samtali við RÚV að niðurstaða miðstjórnarfundarins staðfesti að það er meira en bara afmarkaður hluti flokksmanna ósáttur við stöðuna:
Það er að minnsta kosti ekki hægt að halda því fram eftir þennan fund að það sé bara einhver afmarkaður minnihluti flokksmanna sem er ósáttur við stöðuna. Það er öðru nær,
sagði Sigmundur. Egill Helgason segir í pistli hér á Eyjunni að Framsóknarmenn eigi ekki auðvelt líf framundan með flokksþing í janúar þar sem líklegast skerist í odda, annar óvissuþáttur er veðrið en það er vel hugsanlegt að illfært verði um hávetur:
„Tæplega verður séð að Sigmundur Davíð Gunnlaugsson eigi möguleika á að endurheimta formannssætið, slíkt myndi magna upp hjaðningavíg í flokknum,“
segir Egill. Vitnar hann í orð þeirra Sigmundar Davíðs og Sigurðar Inga, hefur Sigmundi orðið tíðrætt um breytingar sem hafa orðið á stjórnmálunum, en Sigurður Ingi sagði ekki tilefni til að breyta stefnunni þótt einhverjir segðu að heimurinn væri að breytast:
En hver er sú stefna, hverjir eru þeir straumar, af hverju erum við að missa; vilja menn feta sig á slóð forseta Bandaríkjanna eða Le Pen í Frakklandi og fleiri úr þeim ranni? Er einhver í þessum sal sem telur að þar liggi tækifæri Framsóknarflokksins? Er einhver sem telur að með því að víkja frá hefðbundnum gildum flokksins muni fylgið sópast að honum?
Egill segir engan sérstakan sáttatón í orðum Sigurðar Inga, en Sigmundur Davíð býður heldur ekki upp á sættir. Svo sé alltaf möguleiki á að Lilja Alfreðsdóttir varaformaður taki við sem formaður, en hún hefur átt á ágætu sambandi við bæði Sigmund og Sigurð, segir Egill að það mætti túlka það sem svo að hún sé klofvega í flokknum en hún hefur hins vegar ekki viljað segja af eða á hvort hún gefi kost á sér til formanns:
Það er skiljanlegt á þessum tímapunkti, enda getur margt gerst þangað til í janúar. En Lilja, líkt og Sigurður Ingi, er ætti að geta unnið hvort tveggja til hægri og vinstri.
