Reykjanes bað Pál Magnússon fyrsta þingmann Suðurkjördæmis að svara eftirfarandi spurningum.
Fyrir liggur að ekkert auka fjármagn verður sett í lagfæringar á Reykjanesbraut eða Grindavíkurveg á þessu ári. Fleiri vegi á Suðurnesjum þarfnast mikilla endurbóta. Er hægt að sætta sig við að þessi fjölfarnasti ferðammastaður landsins þurfi áfram að bíða?
Orðalag spurningarinnar dregur upp óþarflega dökka mynd af stöðu mála. Þótt ekki sé eyrnamerkt fé til þess sem kallast nýframkvæmdir við þessa vegi þá liggur fyrir að strax í sumar verður ráðist í endurbætur og lagfæringar á þeim báðum. Þetta er fjármagnað með því sem heitir viðhaldsfé Vegargerðarinnar. Auðvitað vildum við að þetta myndi allt gerast hraðar og í stærri skrefum en okkur er allavega að miða nokkuð á leið.
Misserum saman hefur verið rætt um að innheimta gjald af þeim mikla fjölda erlendra ferðamanna sem kemur til landsins til að standa undir hluta kostnaðar við uppbyggingu vegakerfis og aðstöðu á fjölförnum ferðamannastöðum. Rætt hefur verið um ferðamannapassa, vegatolla, hækkun á gistináttaskatti, komugjöld o.fl. en ekkert gerist. Hvaða leið vilt þú fara?
Ein leið útilokar ekki aðrar í þessum efnum og kannski er farsælast að farin verði blönduð leið, líkt og við þekkjum frá ýmsum nágrannalöndum okkar. Varðandi samgöngumannvirkin sérstaklega finnst mér vel koma til greina að fjármagna hin stærstu þeirra með vegatollum eins tíðkast víða um lönd. Við þurfum innan tíðar að ráðast í mjög mikla uppbyggingu á þessu sviði og það er alveg ljóst að þeir fjármunir munu ekki fást af reglubundnum fjárlögum frá ári til árs án þess að aðrir þættir samfélagsþjónustunnar myndu láta verulega undan síga, eins og t.d. heilbrigðisþjónustan – og það er enginn tilbúinn til þess. Til að fjármagna aðra þætti innviðauppbyggingar vegna fjölgunar ferðamanna er ekkert að því að nota blöndu af komugjöldum, gistináttagjöldum, bílastæðagjöldum og þvíumlíku.
Eldri borgarar eru hvattir til þátttöku í atvinnulífinu t.d. með því að taka að sér hlutastarf. Á sama tíma eru frítekjumörk sett í 25. Þúsund krónur á mánuði. Eftir það verður 45% skerðing á greiðslum frá TR, þannig að viðkomandi heldur eftir skatta aðeins um 30% launanna. Er þetta ásættanlegt?
Það hefur öllum verið ljóst að frítekjumarkið þarf að hækka, enda er gert ráð fyrir því í þeirri ríkisfjármálaáætlun sem nú er til lokameðferðar á Alþingi. Við afgreiðslu fjárlaga fyrir síðustu áramót voru þeir settir í forgang sem allra minnst höfðu á milli handanna en nú er komið að því að hækka frítekjumarkið.
Greinin birtist fyrst í Reykjanesi.
