Reykjavíkurborg hélt tvær veislur til að kveðja Svanhildi Konráðsdóttur, sem nú er að láta af störfum sem sviðstjóri menningar- og ferðamálasviðs borgarinnar til að taka við sem forstjóri Hörpu. Þetta herma heimildir Viðskiptablaðsins. Kveðjuhóf Svanhildar var haldið í Höfða og kostaði það rúmar 400 þúsund krónur, sem er svipuð upphæð og grunnlaun félagsmanna Starfsmannafélags Reykjavíkurborgar þegar miðað er við launakönnun Gallup í fyrra.
Finnst þetta ekki fréttnæmt
Greint var frá í Fréttablaðinu í morgun að rúmur helmingur, eða 195.600 krónur, hafi farið í snittur og pinnamat en á gestalistanum voru alls um 70 manns. Bjarni Brynjólfsson upplýsingastjóri Reykjavíkurborgar taldi þetta ekki vera fréttnæmt:
„Mér finnst þetta ekki vera frétt, eða þannig séð. Ég held að það hafi alltaf verið haldið einhvers konar kveðjuhóf þegar æðstu embættismenn borgarinnar hætta,“
sagði Bjarni í samtali við Fréttablaðið.
Líf Magneudóttir, núverandi forseti borgarstjórnar segir eðlilegt að kveðja starfsfólk með táknrænum hætti og gera vel við það:
„Auðvitað má spyrja sig hvort það megi ekki spara þarna líka og hvort það megi ekki fækka svona veislum. Það væri væntanlega það fyrsta sem fengi að fjúka ef það harðnar í ári að verja peningum í slíkt.“
Sérstakt að eyða í veislur í stað grunnþjónustu
Marta Guðjónsdóttir borgarfulltrúi Sjálfstæðisflokksins segir kostnaðinn við veislurnar hljóta að hafa verið tekinn beint úr vösum skattgreiðenda:
Á meðan við getum ekki sinnt grunnþjónustu í borginni, þá er mjög sérstakt að við getum verið að eyða peningum í að hafa svona fínar og dýrar veislur til að kveðja starfsmenn,
sagði Marta í samtali við Viðskiptablaðið. Innt eftir kostnaðinum við veisluna á Kjarvalsstöðum, sem mun hafa verið haldin fyrir Svanhildi á Kjarvalsstöðum, sagði Marta:
Ég hef ekki hugmynd um hver greiddi fyrir veisluna sem þú nefnir á Kjarvalsstöðum, né hver kostnaðurinn við hana er, en það hlýtur að vera hægt að þakka fólki fyrir vel unnin störf og kveðja það með tilhlýðilegri virðingu, án þess að það þurfi að kosta svona mikið.
