Það liggur fyrir að ef Svala Björgvinsdóttir fer með sigur af hólmi í Söngvakeppni evrópskra sjónvarpsstöðva, Eurovision, þá muni talsverður kostnaður falla á Ísland við að halda keppnina. Farið er yfir þetta á glettinn hátt í Markaðspunktum greiningadeildar Arion Banka í dag en í kvöld mun Svala syngja lagið Paper fyrir Íslands hönd. Þó svo að Svala sé einstaklega hæfileikarík og að hálf þjóðin hafi tekið höndum saman við að velja lagið þá er á brattann að sækja því þegar er búið að spá mörgum þjóðum áfram og aðeins 10 komast áfram af 18.

Ef svo vill til að Svala fari með sigur af hólmi þá kæmi það til með að kosta 4,1 milljarð króna að halda keppnina árið 2018. Það eru talsverðir peningar og margt hægt að gera við þá. Hefur greiningadeildin því tekið saman nokkra hluti sem hægt er að gera við alla þessa peninga, hafa skal í huga að þetta er aðeins til gamans gert.

Til dæmis sé hægt að kaupa 2.590.484 eintök af Waterloo með ABBA á vínyl, eða rúmlega 7 eintök á hvern Íslending. Dreifingarkostnaður er hins vegar annað mál.

Fyrir 4,1 milljarð króna er hægt að framleiða 4 seríur af Ófærð, rekið 3 sinfóníuhljómsveitir í heilt ár, rekið RÚV í 263 daga, farið með íslenska karlalandsliðið í knattspyrnu á 3 EM eða þá rekið 51 lið í Pepsi-deild karla í heila leiktíð.

Fátt hefur verið meira til umræðu en Landspítalinn undanfarin misseri, hann kostar töluvert og fyrir 4,1 milljarða er hægt að reka hann í tæpan mánuð.

Það er líka margt annað sem hægt er að eyða 4,1 milljarði í, til dæmis yrði hægt að byggja 143 80fm. íbúðir eða kaupa 106 80fm. íbúðir, fyrir utan hverfi 101 og 107 í Reykjavík. Hægt yrði að borga 777 grunnskólakennurun árslaun eða borgað menntun í eitt ár fyrir 2.296 grunnskólanemendur. Einnig yrði hægt að kaupa Samsung Galaxy S7 handa rúmlega 16% þjóðarinnar eða iPhone 7 síma fyrir rúmlega 12% þjóðarinnar.