Á undanförnum árum hefur verið afar ánægjulegt að fylgjast með uppbyggingu og velgengni hátæknifyrirtækisins Skagans3x. Það er landsbyggðarfyrirtæki með stöðvar á Akranesi og Ísafirði.

Stöðugt vinnast nýjir sigrar. Gerðir eru stórir samningar um framleiðslu og sölu tækjabúnaðar í fiskvinnslufyrirtæki á landi og um borð í skip. Nú síðast eru það sjálfvirk lestarkerfi um borð í nýja íslenska ísfisktogara. Þegar Vesturland er að fara í prentun berast svo fregnir af því að Skaginn3x muni sjá um framleiðslu á vinnslubúnaði fyrir uppsjávarfisk um borð í franskan togara sem verður með fullkomnustu fiskiskipum í heimi.

Undanfarið hefur fyrirtækið síðan rakað til sín verðlaunum. Það hlaut verðlaunin „Svifölduna“ á Sjávarútvegsráðstefnunni 2016 fyrir framúrstefnulega þróun á sviði ofurkælingar á fiski og nú í mars voru það svo Nýsköpunarverðlaun Íslands. Toppurin á þessu öllu kom svo í síðustu viku þegar Skaginn3x hlaut Úflutningsverðlaun forseta Íslands. Allt er þetta mikill heiður og viðurkenning á góðu starfi og full ástæða til að óska starfsfólki og eigendum fyrirtækisins innilega til hamingju með þennan frábæra árangur.

Þetta hlýtur að vera mikil hvatning til frekari dáða. Íslendingar búa yfir mikilli verkþekkingu á tæknisviði sjávarútvegsins. Mikil kunnátta á tæknisviðinu sem snýr að málmiðnaðarhlutanum svo sem í fiskvinnslu og öðrum matvælaiðnaði hefur skapast á Akranesi. Það ætti að fara í stefnumótun og vinnu til að efla þetta enn frekar. Þar ætti að byrja á því að efla og hlúa að námi í tæknigreinum við Fjölbrautaskóla Vesturlands á Akranesi og hvetja fólk með ráðum og dáð til að mennta sig á þessum sviðum. Með tíð og tíma myndi þetta skila sér margfalt í frjórri atvinnuppbyggingu.

Framtíðin liggur í tækninni. Vestur í Kaliforníu er Silicon Valley þar sem er draumaland heimsins á sviði tölvutækni. Höfum það sem fyrirmynd og gerum Akranes að Sílikondal sjávaútvegsins.

Magnús Þór Hafsteinsson, ritstjóri.

Leiðari birtur í landshlutafréttablaðinu Vesturlandi: