Reykjavíkurborg hefur ákveðið að veita landflótta rithöfundi frá Bangladesh skjól þar sem henni er tryggður öruggur dvalarstaður og efnahagslegt öryggi. Þetta er þriðji rithöfundurinn sem Reykjavíkurborg tekur á móti. Þetta kemur fram í tilkynningu frá Reykjavíkurborg.

Rithöfundurinn heitir Ana Naila Zahin, bloggari og aktivisti, fædd árið 1995 í Bangladesh. Ana hefur verið virk í skrifum á bloggsíðum og í fjölmiðlum í heimalandi sínu. Árið 2013 tók hún virkan þátt í Shahbag mótmælunum í Bangladesh ásamt þúsundum annarra en mótmælin snéru að ákvörðun stjórnvalda um að dæma til dauða aðila sem tekið hafði þátt í vopnaðri baráttu gegn stjórnvöldum árið 1971.

Í skrifum sínum fjallar Ana meðal annars um kynjajafnrétti, feminisma, trúleysi og stjórnmál. Ana var neydd til að hætta háskólanámi og varð að fara í felur um mitt ár 2016 þar sem öryggi hennar var ógnað. Frá árinu 2016 hafa fimm félagar hennar verið myrtir og munu stjórnvöld í landinu ekki getað tryggt öryggi hennar.

Ana hefur óskað eftir því að hefja háskólanám hérlendis í haust.