Sett verður á fót skrifstofa innan atvinnuvega- og nýsköpunarráðuneytisins sem mun eingögnu sjá um málefni ferðaþjónustunnar. Er þetta gert í samræmi við stefnu ríkisstjórnarinnar um að efla og auka vægi ferðaþjónustunnar í stjórnsýslunni. Þetta kemur fram í fréttatilkynningu frá ráðuneytinu.
Sigrún Brynja Einarsdóttir verður skrifstofustjóri ferðamála, en þar koma fimm manns til að starfa fyrst um sinn en reiknað er með að þeim fjölgi.

Fyrst um sinn verða fimm starfsmenn á hinni nýju skrifstofu ferðamála en reiknað er með að á næstu misserum gæti þeim fjölgað um einn til tvo til að styrkja starfið enn. Sigrún Brynja Einarsdóttir verður skrifstofustjóri.

Þórdís Kolbrún Reykfjörð Gylfadóttir ferðamála-, iðnaðar- og nýsköpunarráðherra segir tækifærin í ferðaþjónustu mikil, en ekkert lát virðist vera á fjölgun erlendra ferðamanna hingað til lands:

Frá árinu 2010 hefur fjöldi erlendra ferðamanna ríflega fjórfaldast og ferðaþjónustan er nú ein allra mikilvægasta stoðin undir íslensku efnahagslífi. Tækifæri í íslenskri ferðaþjónustu eru mikil en hröðum vexti fylgja stórar áskoranir. Hlutverk stjórnvalda er að treysta stefnumótun, regluverk og uppbyggingu innviða svo ferðaþjónustan geti haldið áfram að blómstra í sátt við umhverfi, náttúru og samfélag.