Það kemur kannski ekki sérlega á óvart að meirihluti Sjálfstæðisflokksins í Reykjanesbæ skuli vera fallinn sæmkvæmt könnun sem birtist í Morgunblaðinu, ekki eftir allt sem á undan er gengið. En fylgið er samt ennþá mikið, 37 prósent, það er vel yfir landsmeðaltali.

Sparisjóðaskýrslan var hroðaleg fyrir Sparisjóð Keflavíkur, bærinn er afar skuldugur og nú er orðið ljóst að það er ekki hægt að kenna vinstri stjórn um að álverið í Helguvík er ekki að skila sér. Fyrir því eru flóknari ástæður.

Ekki verður samt betur séð af skoðanakönnuninni en að Sjálfstæðisflokkurinn verði áfram við völd í bæjarfélaginu. Fylgi hinna flokkanna er mjög tvístrað. Samfylkingin er með 16 prósent, Píaratar með 14 prósent, önnur framboðsöfl með í kringum tíu prósent. Það er því ljóst að atkvæðin nýtast afar illa og margir flokkar þurfa að koma sér saman ef halda á Sjálfstæðisflokkum fyrir utan bæjarstjórnina.

Á Akranesi er Sjálfstæðisflokkurinn hins vegar í sókn. Það helgast ekki síst af því að í efsta sætinu er vinsæll maður og vel liðinn, Ólafur Adolfsson, apótekari og fyrrverandi knattspyrnumaður. Þar er gríðarleg fylgissveifla til Sjálfstæðisflokksins sem fengi 43 prósent samkvæmt nýrri könnun.

Þannig er ekki einhlítt hvernig fylgislínur eru fyrir kosningarnar sem verða eftir þrjár vikur. Samfylkingin virðist standa heldur veikt víðast hvar, en í Fjarðarbyggð er Fjarðarlistinn (Samfylking og VG) þó með 40 prósent, bætir við sig 10 prósentustigum.

En á Akureyri er allt á tvist og bast eftir hrun Lista fólksins. Þar eru Sjálfstæðisflokkur, Björt framtíð og Bæjarlistinn svokallaður með í kringum 20 prósent, Vinstri græn með 16 prósent, Framsókn með 12 prósent og Samfylking með 9 prósent. Það er áberandi rýrt og merkilegt að BF skuli vera miklu stærri en Samfylking og Framsóknarflokkur. Á Akureyri þarf að minnsta kosti þrjá flokka til að mynda meirihluta.