Þessi dálítið einkennilega grein birtist í Morgunblaðinu í dag, höfundur er óþekktur en kallar sig Innherja. Hann er að mælast til þess að útrásin hefjist hefjist aftur. En í greinini birtist nokkuð bágur söguskilningur. Þarna er fjallað um hugtakið útrásarvíkingur, sem var þokkalega jákvætt framan af en hefur nú afar neikvæða merkingu.
Greinarhöfundi virðist ekki vera kunnugt um að einn sá maður sem aðallega hélt þessu á lofti var Ólafur Ragnar Grímsson, forseti Íslands, sem gerðist einn ákafasti talsmaður útrásarvíkinga og ímyndarsmiður þeirra.
Þarna er talað um að nauðsyn sé að reisa „útrásina til vegs og virðingar“, sé erfitt að sjá hvernig megi tryggja góð lífskjör hér á hjara veraldar án hennar.
En „útrásin“ hefur auðvitað aldrei hætt. Hún var til staðar áður en „útrásarvíkingarnir“ hér um með eyðandi afli sínu og settu allt á hausinn og hún hélt áfram eftir það.
Íslendingar selja fisk víða um heim og sum útgerðarfyrirtæki íslensk starfa alþjóðlega, fyrirtæki eins og Marel, CCP og Össur eru enn til, þau hafa bara aldrei verið kennd við „útrás“. Plain Vanilla er fyrirtæki sem sækir fram á alþjóðavettvangi, en við köllum það ekki „útrás“. Það er meðal annars miklu markaðsstarfi erlendis að þakka að útlendum ferðamönnum hefur fjölgað mikið.
Íslendingar eiga auðvitað að sækja fram í alþjóðlegum viðskiptum. Landið hérna er smátt – oft alltof smátt fyrir framtaksamt fólk. En nú er það sem helst hamlar gjaldeyrishöft – sem eru meðal annars ríkjandi hér vegna þess furðulega liðs sem stóð fyrir síðustu „útrás“.
Annars bregður fyrir í greininni orðinu „athafnaskáld“, það er sprottið af orðinu „athafnamaður“ sem er væntanlega íslensk þýðing á „enterpreneur“. Athafnamenn voru áberandi á síðum Morgunblaðsins í eina tíð – yfirleitt voru þetta karlar sem höfðu af eigin rammleik byggt upp útgerðarfyrirtæki úti á landi. Upp úr því varð svo til athafnaskáldið.
Orðið minnir reyndar nokkuð á rússnesku konstrúktívistana og ítölsku fútúristana á fyrstu áratugum tuttugustu aldarinnar, menn sem sáu skáldskap í athafnasemi, framförum og vélvæðingu.
