Columbia háskóli í New York í Bandaríkjunum er einn sá allra besti í heimnum, í nýlegri könnun er hann í fjórtánda sæti yfir háskóla veraldarinnar. Enginn háskóli í heimi hefur getið af sér jafn marga Nóbelsverðlaunahafa, en árlega sér skólinn um að veita hin virtu Pulitzer verðlaun – þau eru veitt fyrir afrek í blaðamennsku, bókmenntum og tónlist.

Meðal frægðarfólks sem hefur stundað nám við háskólann eru forsetarnir Theodore Roosevelt, Franklin D. Roosevelt og Barak Obama, fjárfestirinn Warren Buffett, hæstaréttardómarinn Ruth Bader Ginsburg, utanríkisráðherrann Madeleine Albright, hagfræðingurinn Milton Friedman og rithöfundurinn J.D. Salinger.

„Áhrifamaður í íslensku atvinnulífi“, eins og það er orðað í Kjarnanum, reyndi að hafa áhrif á störf Jóns Steinssonar hagfræðings við þennan fræga háskóla. Viðkomandi, sem Jón vill ekki segja hver var, sendi deildarforseta í Columbia bréf þar sem hann kvartaði undan skrifum Jóns í íslenska fjölmiðla.

Líklega hefur þeim fundist þetta kynlegt í menntastofnun þar sem er hefð fyrir akademísku frelsi, en Jón lýsir viðbrögðunum þannig.

„Ef þessir menn reyna að hafa áhrif á yfirmann hagfræðideildar í Columbia, sem þeir hafa augljóslega engin tök á, þá getur maður bara ímyndað sér hvernig það er þegar einhver í háskólum á Íslandi skrifar svona.“

Það er lóðið. Hvernig láta menn sem reyna þagga niður í starfsmönnum frægustu háskóla í heimi þegar þeir eru á heimavelli – í litla landinu sínu?

Jón Steinsson er pistlahöfundur hér á Eyjunni. Hann er dósent í hagfræði við Columbia háskóla. Jón segir í Kjarnanum að þátttaka hans í opinberri umræðu sé óaðskiljanlegur hluti af starfi hans sem háskólakennara.