Pamela Geller er bandarískur bloggari sem er býsna vel þekkt í landi sínu. Hún hefur fengið að koma fram í fjölmiðlum sem eiga að teljast virtir, en blogginu sínu velur hún nafn úr bók eftir Ayn Rand og kallar það Atlas Shrugs.
Geller hefur verið samstarfskona Roberts Spencer sem gefur sig út fyrir að vera mikill sérfræðingur um íslam. Þau hafa meira að segja skrifað saman bók um meint stríð Obama forseta gegn Bandaríkjunum. Anders Breivik vitnar mikið í Spencer.
Það er til marks um hvernig ástandið á pólitískri umræðu er í Bandaríkjunum að Geller var einn af opinberum bloggurum á landsþingi Repúblikanaflokksins.
Geller segir á bloggi frá því í gær að sumarbúðirnar á Útey þar sem Anders Breivik framdi ódæðisverk sitt hafi verið þjálfunarstöð í gyðingahatri – búðir fyrir kommúnista og sósíalista sem gangi erinda íslams.
Það verður sífellt langsóttara að segja að þetta snúist um „einmana úlfa“. Þegar íslamistar fremja hryðjuverk er það kallað pólitík sem helst allur hinn íslamski heimur þarf að sverja af sér. þegar hvítur ljóshærður maður er á ferð – með pólitíska hugmyndafræði sem margir virðast aðhyllast – er það einstakur atburður og skýringa leitað í geðlæknisfræðinni. Passar það alveg?
Um þetta má lesa á vef sem nefnist loonwatch.com, en þar má líka lesa um bréf sem Geller fékk frá norskum manni sem sagðist vera að safna vopnum og skotfærum.
