Í Bretlandi deila stjórnarflokkarnir, Íhaldið og Frjálslyndir demókratar, um nýjar reglur um bankaviðskipti. Frjálslyndir vilja setja lög sem skilja að starfsemi viðskiptabanka og fjárfestingarbanka, en það vill Íhaldsflokkurinn ekki.

Það er vandséð hvernig á að taka á bönkunum í því ástandi sem nú ríkir. Bankar eru enn of stórir til að falla. Ríki horfa yfir í garð nágrannans – þau vilja ekki setja strangari reglur en hann af ótta við fjármagnsflótta. Því er erfitt að vinda ofan af bankabrjálæðinu nema með einhvers konar alþjóðasamningum. Þeir eru hins vegar ekki í sjónmáli.

Sumir binda vonir við einhvers konar uppreisn almennings gegn þessu – þeir hafa horft til Aþenu, Madrid og Reykjavíkur á sínum tíma. En því miður eru þessi mótmæli veik og fálmkennd – og samstaðan um hugmyndir er ekki mikil og úthaldið er lítið þannig að yfirleitt eru það fámennir jaðarhópar sem eru mest áberandi.

Á meðan þurfa bankarnir ekki að óttast um sinn hag.