Eva Joly færðist í gær skrefi nær því að verða frambjóðandi í forsetakosningunum frönsku.

Þá voru greidd atkvæði milli þeirra sem sækjast eftir útnefningu hjá flokki græningja.

Eva Joly hlaut næstum hreinan meirihluta í fyrri umferð. Hún hlaut 48,7 prósent atkvæða, en sjónvarpsstjarnan Nicholas Hulot hlaut 40,2 prósent. Kosið verður á milli þeirra 12. júlí.

Forsetakosningarnar eru ekki fyrr en á næsta ári. En þær eru í nokkru uppnámi vegna handtöku Dominique Strauss Kahn, sem þótti einna líklegastur til að skáka Sarkozy forseta.

Vænlegasti frambjóðandi Sósíalistaflokksins nú er Martine Aubry, sem er dóttir sjálfs Jacques Delors, fyrrum framkvæmdastjóra ESB. Spurning er þó hvernig hún nær að höfða til kjósenda.

Önnur kona gæti sett strik í reikninginn, en það er Marine Le Pen, dóttir hins ofstopafulla þjóðernissinna Jean Marie Le Pen. Marina þykir býsna klókur stjórnmálamaður og hefur mildað nokkuð málflutning föður síns.

Það er því möguleiki að þrjár konur gætu verið í kjöri gegn Sarkozy í kosningunum á næsta ári.