Tvö sérlega glæsileg einbýlishús standa við Hofsvallagötuna, hlið við hlið. Annað er hús sem reist var af Vilhjálmi Þór, bankastjóra og athafnamanni, en hitt var sem samvinnumenn byggðu fyrir Jónas Jónsson frá Hriflu. Þetta eru semsagt framsóknarhús. Ég þekki þau nokkuð vel, ekki vegna þess að mér hafi nokkurn tíma verið boðið þangað inn, heldur vegna þess að ég bjó í Vesturbænum þegar ég var strákur, og þá fannst manni einhvern veginn nærtækara að klifra yfir garða fremur en að ganga á götum – ég stytti mér oft leiðina í skólann í gegnum garða þessara húsa.

Í húsi Vilhjálms Þórs hafa búið umdeildir menn. Vilhjálmur sjálfur var ekki sérlega vel þokkaður, hann var ráðherra í utanþingsstjórninni 1942-1944, harður í hagsmunagæslu fyrir Sambandið og var svo höfuðpaurinn í olíumálinu sem þótti mikið hneyksli á sínum tíma. Sjálfur Björgólfur Guðmundsson bjó þarna um tíma, svo Herluf Clausen og síðustu ár hefur búið þarna Guðmundur A. Birgisson, sem er kenndur við Núp í Ölfusi. Allir hafa þessir menn komist í fréttir vegna umdeildra viðskipta.

Í Hamragörðum, húsi Jónasar frá Hriflu, var um hríð félagsheimili samvinnumanna. Þá var þetta ekkert sérlega flott, linoleumdúkar á gólfum og innréttingar heldur fátæklegar. Síðar eignaðist Elvar Örn Aðalsteinsson húsið og gerði það upp, en síðari ár hefur eigandi þess verið Kári Stefánsson. Nú er það til sölu, tekið er fram að allt sé húsið sérlega glæsilegt og að lofthæð sé þrír metrar. Líklegt er að farið sé fram á meira en hundrað milljónir fyrir húsið. Húsið var teiknað af Guðjóni Samúelssyni sem var eins konar hirðarkitekt Jónasar frá Hriflu.