Stjórnarliðið brást hratt við og hefur sett vantrauststillögu Sjálfstæðisflokksins á dagskrá strax í dag klukkan fjögur. Málið verður semsagt útkljáð í kvöld.

Staðan er þessi:

Sjálfstæðismenn greiða allir atkvæði með tillögunni. En það er auðvitað dálítið kynlegt að þeir skuli leggja fram vantraust í framhaldi af máli sem ríkisstjórnin tapaði vissulega – en þeir studdu líka.

Framsóknarmenn greiða líka atkvæði með tillögunni segir Sigmundur Davíð, en það er spurning með Guðmund Steingrímsson og Siv Friðleifsdóttur. Siv hefur lýst vilja til þess að starfa með ríkisstjórninni. Í Mogganum í dag er talað um að þau séu á jafnvel.

Hreyfingin er ekki búin að ákveða sig. Hún er í grimmri stjórnarandstöðu, en það er spurning hvort hún vilji vera með í leiðangri Sjálfstæðisflokksins. Henni var ekki boðið að vera með í að leggja fram vantrauststillöguna.

Atli Gíslason segir að ekki sé sjálfgefið að hann styðji tillöguna, ekki er vitað um Lilju Mósesdóttur.

Stjórnarliðið greiðir atkvæði gegn tillögunni, eða það verður að ætla. Líka Ásmundur Einar Daðason og Guðfríður Lilja Gísladóttir. Ef ekki, þá gæti stjórnin staðið af sér vantraustið, en þá væru þau tvö í raun endanlega horfin úr stjórnarliðinu – allt annað en nei frá þeim myndi jafngilda úrsögn.

Þannig að vantraustið verður fellt. Umræðurnar í þinginu gætu orðið harðar, þó ekki sé víst að öllum muni þykja þær skemmtilegar í því ástandi pólitískrar þreytu sem nú ríkir.