Margir sem hafa tjáð sig hér á vefnum um brotthvarf Lilju og Atla úr þingflokki VG fussa og sveia yfir fjórflokknum og flokksræðinu sem sé allt að drepa á Íslandi.

Margir vilja að boðað sé til kosninga.

En hvað gætu kosningar haft í för með sér í þessu ástandi’

Líklega myndi Sjálfstæðisflokkurinn bæta mjög hlut sinn miðað við síðustu kosningar þegar hann beið afhroð. Hann myndi líklega þokast yfir 30 prósenti aftur.

Samfylkingin og VG myndu tapa einhverju – þó er ekki útilokað að annar hvor flokkurinn gæti að minnsta kosti unnið einhvers konar varnarsigur.

Fátt bendir til annars en að fylgi Framsóknarflokks myndi standa nokkurn veginn í stað.

Og Hreyfingin – hún hefur ekki verið að skora grimmt í skoðanakönnunum.

Þá er spurning um einhvers konar Gnarr-áhrif. Ný stjórnmálaöfl. Gamanið er óðum farið að kárna kringum Besta flokkinn svo varla yrði mikils að vænta af honum á landsvísu.

Gætu einhverjir aðrir flokkar litið dagsins ljós og náð árangri:

Nýr vinstri flokkur með Lilju Mósesdóttur í fararbroddi?

Nýr evrópusinnaður frjálslyndur flokkur á miðjunni?

Nýr þjóðernisflokkur?

Eða myndi fjórflokkurinn kannski bara halda tökunum áfram?

Best væri fyrir hann að boða til kosninga nokkuð skyndilega svo önnur öfl næðu ekki að skipuleggja sig, rétt eins og gerðist í kosningunum vorið 2009.

Því fáir þingmenn vilja þurfa að skiljast við sætið sitt.