Í Silfrinu í gær lýsti Paul Krugman yfir stuðningi við Occupy hreyfinguna. Hann sagðist hafa haldið að hlutirnir myndu breytast eftir áfallið 2008, en það hafi þeir ekki gert.

Krugman sagði að verðtryggingin á Íslandi væri mistök – hún væri andfélagsleg. En um íslensku krónuna sagði hann að hún hefði verið gagnleg. Verðtryggingin hægði hins vegar á efnahagsbatanum.

Willem Buiter er ekki hrifinn af verðtryggingunni heldur, hann segir að það verið að binda enda á hana þrátt fyrir að sumir séu hrifnir af vörninni sem í henni felst.

Buiter – sem er einn skarpasti hagfræðingur í heimi – talaði um að 110 prósenta leiðin sem hér hefur verið farin sé geggjun. Hann telur að nær væri að fara 70 prósenta leið, það sé nauðsyn að hafa almenna skuldauppgjöf (jubilee). Buiter telur að Ísland muni þurfa að bindast stærri heild í framtíðinni, ein af ástæðunum sé einfaldlega skortur á mannauði.

Simon Johnson er áhyggjufullur vegna þeirrar stöðu sem heimurinn er í – þar sem fjármálaheimurinn hefur tekið völdin af stjórnmálunum. Margir bankar eru taldir of stórir til að falla, þrátt fyrir ógöngurnar sem þeir hafa komið okkur í. Heilu ríkin riða á barmi falls vegna skulda – Johnson telur að þurfi að fara að mikilli gát við að trappa kerfið niður.

Hafi menn haldið að hagfræðingarnir á ráðstefnu AGS væru einhvers konar jámenn var það misskilningur – þetta var hin gagnlegasta samkoma þar sem fóru fram óheft en siðuð skoðanaskipti.