Það er víðar að lagt er fram plan B en á Íslandi.

Hundrað breskir hagfræðingar skrifa opið bréf til Georges Osborne fjármálaráðherra og hvetja hann til að hverfa frá efnahagsstefnu ríkisstjórnarinnar.

Atvinnuleysi hefur ekki verið meira í Bretlandi í sautján ár og hagvöxtur er nánast enginn.

Hagfræðingarnir leggja til að horfið sé frá niðurskurði svo hægt sé að vernda störf hjá hinu opinbera, að gert sé átak til að skapa ný „græn“ störf, bætur séu hækkaðar til að koma auknu fé í hendur þeirra sem hafa lágar tekjur svo eftirspurn aukist í hagkerfinu.

Þeir stinga upp á að lagður sé á skattur á fjármagnsflutninga –  en á móti sé lögð aukin áhersla á hugvit og tækni. Þeir leggja til að stofnaður verði breskur fjárfestingabanki sem örvi fjárfestingar í húsnæði, samgöngum og á sviði endurnýjanlegrar orku.

Efstur á lista hagfræðinganna er Ha-Joon Chang, prófessor í hagfræði við Cambridge háskóla. Hann er höfundur frábærrar bókar sem nefnist 23 Things They Don´t Tell You About Capitalism þar sem hann flettir ofan af alls kyns goðsögnum um hagkerfið og hagfræðina.