Ég hef notað Apple tölvur frá því ég byrjaði að nota slík tæki. Var með Apple strax á níunda áratugnum, borðtölvur og síðar fartölvu sem nú myndi þykja ansi frumstæð.

Þá var þetta eins og maður væri í sérstökum klúbbi. Flestir voru með pc – það var voða margt sem ekki var hægt að fá á Apple.

Ég er enn með Appletölvu – ég hef ekki tölu á því númer hvað – og nú er ég líka kominn með iPhone. Konan mín á líka Appletölvu. Sonur minn telur sig hafa loforð frá ömmu sinni um að gefa honum iPad.

Við erum semsagt mjög Applevædd fjölskylda. Og nú er hefur verið tilkynnt að opnað hafi verið fyrir netverslun þar sem er hægt að kaupa alls konar dót fyrir Appletölvur og -síma. Mest af því er skelfilegur óþarfi. Ég hef farið í Applebúðir í London og New York – það eru leiðinlegustu staðir sem hægt er að hugsa sér.

Þetta er algjörlega hætt að vera sérviskulegt eða sérstakt – Apple er eins mainstream og hugsast getur. Þetta er orðið eitt af stærstu fyrirtækjum í heimi. Það dælir út nýjum varningi – maður er varla búinn að fá sér nýja gerð af tölvu eða síma áður en sú næsta kemur á markaðinn. Og jú, þetta eru fínar vörur – þær hafa aldrei brugðist mér. En það er samt eitthvað ofvaxið og græðgislegt við þetta.

Er kannski kominn tími á eitthvað annað?