Milljónir manna í Evrópu hafa farið í tölvur sínar í kvöld og gúglað Aserbaidsjan.
Þetta er eitt fjarlægasta og dularfyllsta landið í Evrópu. Á merka sögu vegna olíu – Bakú var alþjóðleg borg seint á 19. öld og snemma á þeirri . Þar voru karlar eins og Alfreð Nóbel, Sidney Reilly, Jósef Stalín og einhverjir úr Rotschild-ættinni.
Frá þessum tíma eru gamlar og glæsilegar byggingar í borginni. Hún er býsna fjölmenn, þar búa tvær milljónir manna. Síðustu ár hafa líka verið byggð stórhýsi þar fyrir olíugróða. En borgin er líka fræg fyrir að vera einn af menguðustu stöðum á jörðinni. Páll Stefánsson ljósmyndari var handtekinn í Aserbaidsjan í fyrra þegar hann var að taka ljósmyndir af umhverfisspjöllum. Landið getur tæplega talist vera lýðræðisríki. Mannréttindi eru ekki virt, kosningasvindl er algengt. Forseti landsins Ilham Alyev er sonur fyrrverandi forseta sem hét Heydar Aliyev. Sá var líka leiðtogi landsins á tíma Sovétríkjanna og fyrrverandi KGB maður.
Lagið frá Aserbaidsjan var hvorki fugl né fiskur eins og er títt í Evróvisjón. Það er erfitt að ímynda sér að lagið verði ýkja vinsælt. Þetta er svona evrósull sem gæti verið frá hvaða landi sem er. En það er skemmtilegt að þessi þjóð sem er á mörkum Austur-Evrópu og Asíu skuli vinna þessa keppni. Það mun útheimta talsverð ferðalög fyrir keppendur frá öðrum löndum á slóðir sem eru framandlegar.
En erkióvinir Azera í Armeníu fagna tæplega.
Myndin er af umtalaðri hótelbyggingu sem er að rísa í Bakú.
