Það er farið að hitna nokkuð undir Atla Gíslasyni í kjördæmi sínu á Suðurlandi. Atli er langt í frá óumdeildur maður í kjördæminu – og það er líklegt að þrýstingurinn á hann að segja af sér eftir brottförina úr þingflokki VG muni aukast. Varamaður Atla, sem hefur verið nokkuð mikið utan þings, er Arndís Sigurðardóttir. Hún hefur verið hollari flokksforystunni en hann.

Lilja Mósesdóttir hefur, ólíkt Atla, nokkuð fjöldafylgi – bakland sem hún gæti nýtt. En það er víst að líka verður þrýst á hana að hverfa af þingi. Varamaður Lilju er engin önnur en hin gamalkunna þingkona Kolbrún Halldórsdóttir. Hvað afstöðu mun hún taka ef hún sest á þing í fjarveru Lilju?

Annars verður forvitnilegt að sjá hvað Atli og Lilja gera. Tvö saman eru þau frekar veik á þingi, sitja ekki í nefndum, og hafa varla sama aðgang að fjölmiðlum og meðan þau voru í stjórnarliðinu.

Lilja hefur verið mikið í slagtogi með þingmönnum Hreyfingarinnar. En það er ósamstæðari hópur en marga grunar, Þór Saari og Margrét Tryggvadóttir eru til dæmis ekki fráhverf Evrópusambandinu.

Með brottför Lilja og Atla slitnaði í sundur andstöðuhópurinn innan VG sem hefur samanstaðið af þeim tveimur, Ásmundi Einari Daðasyni og að nokkru leyti Ögmundi Jónassyni, Jóni Bjarnasyni og Guðfríði Lilju Grétarsdóttur.

Þannig að kannski má tala um klofning í klofningnum.